18 От ыйа 18.07
  • 20°
  • $ 88,09
  • 96,3

«Золотинка» кыыл пиэрмэтигэр Тверь уобалаһыттан киистэри аҕалаллар

11:09, 19 ноября 2020
Текст:
Читайте нас на
Яндекс Новости
ЯДВ

Нерюнгри улууһун «Золотинка» кыыл пиэрмэтигэр 110 төбө кииһи Тверь уобалаһын «Савватьево» племенной собуотуттан аҕаллылар. Киис иккис баартыйата бу күннэргэ кэлиэ. Барыта 325 кыыл кэлэрэ былааннанар. Бу туһунан Тыа хаһаайыстыбатын министиэрстибэтэ иһитиннэрэр. 


«Уопсайа 250 тыһы киис, 75 атыыр кэлиэхтээхтэр. Бастакы баартыйа этэҥҥэ олохторун буллулар, атыттары бу күннэргэ ситэри аҕалыахпыт», — диэн пиэрмэ дириэктэрэ Ньургун Владимиров иһитиннэрдэ.

Аан бастаан эксперимент быһыытынан 30 кииһи 2018 сыллаахха аҕалан тураллар. Кыыллары хаан тупсарар сыаллаах федеральнай (92%), өрөспүүбүлүкэ (8%) бүддьүөттэрин суотугар аҕалаллар.

2003 сыллаахха племенной хаһаайыстыба аатын ылбыт пиэрмэ бүгүн үрдүк көрдөрүүлээх. Кырымахтаах хара саһылын ахсаанынан өрөспүүбүлүкэҕэ иккис миэстэни ылар. Сыл саҕаланыыта 400 төбө, ол иһигэр 320 тыһы, 80 атыыр саһыллар бааллар. 2020 сыллаахха 997 төрүөҕү ылбыттар. Ити биир саһылга ортотунан 3,2 төрүөххэ тэҥнэһэр.

Кэнники сылларга пиэрмэҕэ кыыл аһылыгын харайар 40 туонналаах тымныы контейнер, ас тарҕатар прицептаах дьоҕус тыраахтар, эт эрийэр, эриллибит эти булкуйар, уҥуоҕу илдьиритэр тэриллэр, ас буһарар хочуол, саҥа кормокуукуна уонна саҥа килиэккэлэр тутуллубуттар.

Улуус бүддьүөтүттэн хаһаайыстыба наадатыгар 9 мөл солкуобай көрүллүбүт.

Өрөспүүбүлүкэ үрдүнэн килиэккэлээх кыыл иитиитинэн сэттэ хаһаайыстыба дьарыктанар, манна 36 киһи үлэлиир.

Следите за самым важным и интересным в Telegram-канале и WhatsApp-группе ЯСИА