Саха сиригэр 2026 сылга федеральнай «Земскэй доктор» уонна «Земскэй фельдшер» бырагыраамаларынан доруобуйа харыстабылын исписэлиистэрин кытта 90 дуогабар баттанна. Сыл устата бу бырагырааманан барыта 107 киһини тардыахтара, диэн өрөспүүбүлүкэ доруобуйа харыстабылын министиэристибэтэ ЯСИА-ҕа иһитиннэрдэ.
Түһэрсиллибит 90 дуогабартан 58 — быраастарга, 32 — биэлсэрдэргэ тиксэр. Кыра куораттарга аҕыс бырааһы уонна биир биэлсэри үлэҕэ ыллылар.
2026 сылга бу бырагыраама чэрчитинэн 67 быраас уонна 40 биэлсэр кэлиэхтээх.
Арктика уонна хотугу улуустарга доруобуйа харыстабылын үлэһиттэригэр туспа өйөбүл миэрэлэр бааллар. Бу территорияларга үлэлиир 40 саастарыгар диэри быраастар дьиэнэн хааччыйыы бырагырааматыгар кыттыахтарын сөп.
2026 сылга бу өйөбүлүнэн 5 дуогабар баттанна. Бырагыраамаҕа кыттыан баҕалаахтартан докумуоннары тутуу олунньу 1 күнүттэн балаҕан ыйын 15 күнүгэр диэри салҕанар.
«Земскэй доктор» уонна «Земскэй фельдшер» федеральнай бырагыраамалар каадырдары кыра куораттарга уонна тыа сиригэр үлэлэтиигэ сүрүн инструменынан буолаллар. Тыа нэһилиэнньэлээх пууннарыгар эбэтэр куораттыы тииптээх бөһүөлэктэргэ көһөн кэлэр быраастарга 2 мөлүйүөн солкуобайдаах биирдэ бэриллэр төлөбүр көрүллэр. Биэлсэрдэргэ итинник усулуобуйаҕа — 1 мөлүйүөн солкуобай. 50 тыһыынчаттан аҕыйах ахсааннаах нэһилиэнньэлээх куораттарга үлэлиир быраастарга 1 мөлүйүөн солкуобай, оттон биэлсэрдэргэ 500 тыһыынча солкуобай төлөнөр.
