2025 сыллааҕы Манчаары оонньуулара Таатта улууһугар ыытыллыахтара. Улуус баһылыга Михаил Соров тэрээһин үлэтэ саҕаламмытын туһунан СИАҕа иһитиннэрдэ.
«Спорт национальнай көрүҥнэригэр XXII Спартакиада сүрүн тэрээһиннэрэ номнуо торумнаммыттара. Билигин министиэристибэлэргэ бигэргэнэ сылдьаллар. Тэрийэр хамыыһыйаны бырабыыталыстыба бэрэссэдээтэлин солбуйааччы Сергей Местников салайар», — диэтэ баһылык.
Саха олимпиадатынан ааттанар Оонньуулар чэрчилэринэн улуустарга саҥа спортивнай эбийиэктэр тутуллаллар, суол, киэргэнии, тупсуу үлэлэрэ бараллар.
«Горнай улууһугар ыытыллыбыт Оонньуулар үрдүк таһымнаахтык аастылар. Бэрдьигэстээх олус сайдыбыт, киэркэйбит, тупсубут. Үгүс сыра ууруллубута көстөр», — диэтэ Михаил Соров.
