Быйыл от ыйыгар хоту улуустарга, чуолаан Үөһээ Дьааҥы, Өймөкөөн улуустарыгар күүстээх, дохсун уһун кэмнээх ардах содулугар бөһүөлэктэр толору ууга бардылар. Оттон ол улахан уу содулуттан биһиги улууспутугар Суотту нэһилиэгэ биллэрдик оҕустарда.
Бу туһунан биһиэхэ Суотту нэһилиэгин тыа хаһаайыстыбатыгар сүрүн исписэлииһэ Зоя Заровняева иһитиннэрдэ:
– Быйыл от ыйын 21-29 күннэригэр Өлүөнэ өрүс уута биллэрдик эбиллэн, нэһилиэкпит 872 гаа оттонор сирэ уу анныгар барда. Ол иһиттэн 572 гаа кытыл, 312 гаа арыы сир ууга тимирдилэр. Ол иһигэр 74 чааһынай хаһаайыстыба, “Лена” ТХПК 125,78 гаа сирэ, бааһынай хаһаайыстыбалар 52,1 гаа оттуур сирдэрэ ууга тураллар. Бу сирдэртэн былаан быһыытынан отчуттар биир тыһыынчаттан тахса тонна оту ылыахтаах этилэр. Билиҥҥи туругунан уу кыралаан түһэ турар, оттон намыһах сирдэргэ уу олорон хаалла.
Хоромньуну ааҕарга аакта оҥоробут. Отчуттарбытыттан аҕыс звено атын нэһилиэктэргэ, улуустарга оттуур балаһыанньаланнылар. Ол курдук чугастыы Нам, Мэҥэ Хаҥалас улуустарыгар, Өлтөх, Баатаҕай нэһилиэктэригэр көһөн оттуурга күһэллиэхтэрэ. Аны туран ууга барбыт от барыта буор буолар, оттон тууһуурга элбэх туус наада буолар. Тиийбэт оту атыылаһары улуус иһиттэн тиэйэри былаанныыбыт. Отчуттарбытыгар 3 тонна сэлээркэ кэлбитэ, өссө 3 тонна уматык бу күннэргэ кэлэрин күүтэбит.
Улуус дьаһалтатыттан анал хамыыһыйа тэриллэн, хонтуруол, салайыы чааһа тэрилиннэ. Онон отчуттарбыт, бу күннэргэ халлаан туран биэрдэр эрэ, сыл тахсар оту улууспут иһиттэн булан сүөһү-ас аччаабатын туһугар күннэтэ күүстээхтик туруулаһа сылдьаллар, суруйда Светлана Сивцева, мюрюгазета.рф
