Уһук Илин федеральнай уокурук делегациятын салайааччыта Владимир Крысин СИА-ҕа «Азия оҕолоро» VI-с спортивнай Оонньуу туһунан санаатын үллэһиннэ.
«Биллэн турар, «Азия оҕолоро» VI-с спортивнай Оонньуу — бэлиэ түгэн. Уһук Илин федеральнай уокурук сүүмэрдэммит хамаандата спорт 21 көрүҥэр, уопсайа 300-тэн тахса спортсмена кыттар. Кинилэр бары барыллаан талыыны аастылар. Күрэстэһии олус улахан, дьоһун кыттааччылар бааллар. Биһиги бүгүн урукку Оонньуу кирбиитигэр иһэбит — 26 мэтээллээхпит, итинтэн 4 — кыһыл көмүс. Өссө да күрэхтэһии – иннибитигэр, онон Уһук Илин спортсменнара кыраһыабай кыайыыларынан үөрдүөхтэрэ дии саныыбын«, —диир Владимир Крысин.
Кини этэринэн, Оонньуу хас ыытылларын ахсын таһыма үрдээн иһэр. «Күрэхтэһиилэр норуоттар икки ардыларынааҕы быраабыланан баралларын бэлиэтиэх этим. Тэрийэр кэмитиэт улахан үлэни ыыппыта, күрэхтэһии буолар сирдэрин аныгы оборудованиенан ситэрбитэ-хоторбута дьэҥкэтик көстөр. Билигин тхэквондо турнирыгар сылдьабыт, манна баар оборудование Рио-де-Жанейроҕа ыытыллар Олимпиадаҕа баар буолуоҕа. Ити барыта күрэхтэһии анал туругун үрдэтэр», — диир делегация салайааччыта.
