16 От ыйа 16.07
  • 23°
  • $ 87,81
  • 95,78

Тулунаҕа өрөспүүбүлүкэ ырыа куттаахтара муһуннулар

17:45, 28 марта 2016
Текст:
Читайте нас на
Яндекс Новости
ЯДВ

Кулун тутар 26 күнүгэр Уус Алдан улууһун Тулуна бөһүөлэгэр ырыаһыт Светлана Журавель бырайыагынан аан бастакытын «Ахтылҕан ырыабын Тулунабар аныыбын» диэн ырыа өрөспүүбүлүкэтээҕи күрэһэ ыытылынна.


«Олохтоох сынньалаҥ киинэ уонна нэһилиэк дьаһалтата биир дойдулаахпыт, бары таптыыр ырыаһыппыт бырайыагын өйөөн ыыппыт күрэспитигэр Дьокуускайтан, Мэҥэ Хаҥаластан, Өлүөхүмэттэн, Кэбээйиттэн, Үөһээ Дьааҥыттан, Анаабыртан тиийэ кыттааччылар кэлэннэр, үрдүк таһымнаахтык ааста. Кыттааччыларга барыларыгар кэриэтэ анал бириистэр олохтоммуттара күрэс үрдүк тэрээһиннээҕин туоһулаата. Олохтоох дьаһалта, сынньалаҥ киинэ, нэһилиэк тэрилтэлэрэ, киин куоракка олорор биир дойдулаахтарбыт түмсүүлэрэ, Антон Иванов «Добун» студията, Дьокуускай куорат социальнай көмүскэлгэ управлениета уонна Строительнай уокуругун дьаһалтата о.д.а. бириистэри туруораннар күүс-көмө буоллулар», — диэн Тулунатааҕы «Сайдыы» сынньалаҥ киин сүрүннүүр специалиһа Альберт Находкин иһитиннэрдэ.

Күрэс балаһыанньатынан кыттааччылар төрөөбүт дойду туһунан уонна биир талбыт ырыаларын толороннор, бэрт сэргэх киэһэни бэлэхтээтилэр. Онуоха бастакы бөлөххө (15-тэн 18 саастарыгар диэри) I степеннээх лауреат аатын Алена Гоголева (Тулуна, Уус Алдан) ылла, II степеннээх лауреатынан Андрей Латышев (Тулуна, Уус Алдан), III степеннээх лауреатынан Уля Бурнашева ааттаннылар, оттон Даян Сыромятников (Чараҥ, Уус-Алдан), Наташа Алексеева (Кэбээйи) уонна Валерия Шарина (Мэҥэ Хаҥалас) дипломаннарынан буоллулар. Иккис бөлөххө (19-тан үөһэ саастаахтар) Юлия Говорова (Арыылаах, Уус Алдан), Мария Алексеева (Биэттэ, Уус Алдан), Иван Карпов (Тулуна, Уус Алдан) лауреаттарынан ааттаннылар, Афанасий Атласов (Үөһээ Дьааҥы), Саргылаана Алексеева (Анаабыр) уонна Виктория Николаева (Анаабыр) дипломнары туттулар.

Бырайыак ааптара Светлана Журавель анал бирииһин бастыҥнартан бастыҥынан ааттанан Мэҥэ Хаҥалас Төхтүрүттэн Лилия Стручкова ылла.

Следите за самым важным и интересным в Telegram-канале и WhatsApp-группе ЯСИА