«Триумф» спортивнай бэлэмнэнии киинэ дойду бастыҥ спортивнай тутууларын ахсааныгар киирдэ, «Арена» аан дойдутааҕы кыттыылаах IV национальнай куонкуруска иккис миэстэни ылла. Саха сирин комплекса « Зрелищные объекты спорта» номинацияҕа бэлиэтэннэ.
Наҕараадалааһын үөрүүлээх сиэрэ-туома Москваҕа ыытылынна.
Быйыл куонкурус кыттааччыларын ахсааннарынан рекорд ситистэ: көрүүгэ Россия 79 регионуттан, ону таһынан Беларусьтан, Азербайджантан уонна Арменияттан 452 сайаапка киирдэ. Тэрийээччилэринэн Россия Олимпийскай кэмитиэтэ, Россия Паралимпийскай кэмитиэтэ уонна РФ спордун министиэристибэтин өйөбүлүнэн Россия спортивнай тутууларын ассоциациялара буоллулар.
Эбийиэктэри сыаналааһыны профессиональнай экспертнэй дьүүллүр сүбэ ыытта, састаабыгар профильнай биэдэмистибэлэр, бастыҥ спортивнай тэрилтэлэр, федерациялар уонна салаа түмсүүтүн бэрэстэбиитэллэрэ киирдилэр.
Дойду күүстээх спортивнай тутууларын ортотугар «Триумф» эмиэ баар буолла.
Бу наҕараада — эбийиэги билинии эрэ буолбатах. Кини спорт сайдыытыгар, аныгы инфраструктураны тэрийиигэ уонна спортсменнары бэлэмнииргэ сөптөөх усулуобуйаны хааччыйыыга өрөспүүбүлүкэҕэ ыытыллар киэҥ далааһыннаах үлэни көрдөрөр.
“Триумф” Саха сирин биллэр спорт бэлиэлэриттэн биирдэстэрэ буолбута ыраатта. Манна сүүмэрдэммит хамаандалар эрчиллэллэр, бөдөҥ күрэхтэһиилэр, культурнай уонна социальнай суолталаах тэрээһиннэр ыытыллаллар, саҥа кыайыылар үөскүүллэр, трибуналар тыһыынчанан ыалдьааччылары хомуйаллар.
Билигин комплекс үрдүк таһыма национальнай таһымҥа эмиэ билиниини ылла.
Саха сирэ Россия бөдөҥ спортивнай кииннэрин ортолоругар дьоһуннаахтык көрдөрүллэрэ ордук улахан суолталаах. Үрдүк таһымнаах аныгы спортивнай инфраструктура Уһук Илиҥҥэ, ол иһигэр Уһук Хоту сир судургута суох усулуобуйатыгар ситиһиилээхтик сайдар.
