13 От ыйа 13.07
  • 18°
  • $ 87,74
  • 95,76

Томпоҕо олорор Ленинграды көмүскээбит зенитчица 95 сааһын туолла

17:00, 17 октября 2016
Читайте нас на
Яндекс Новости
ЯДВ

Томпо улууһугар үc сэрии бэтэрээнэ баарыттан иккитэ дьахтар. Надежда Прокопьевна Баженова саас ыам ыйын 10 күнүгэр 90 сааһын туолбута. Бу күһүн Ленинграды көмүскээбит зенитчицэ Любовь Николаевна Калабина (Толстоброва) 95 сааһын туолла.


Любовь Николаевна Калабина Нижегородскай уобаласка төрөөбүтэ, 7 кылааһы үөрэнэн бүтэрбитэ. Эдэркээн Люба Толстоброва 1942 сыллаахха 21 сааһыгар армияҕа ыҥырыллыбыта. Кини сулууспалаабыт зенитнэй артиллериятын дивизиона 1942 сыллаахха Войбакало станцияны оброналааһыҥҥа турбута, оттон 1943 сыллаахха Волховтааҕы ГЭС көмүскээбитэ. Кэлин зенитнэй батарея гвардейскай ааты ылбыта, сэрии устата өстөөх 19 самолетун суулларбыттара. Любовь Николаевна ефрейтор званиелаах, «Ленинграды көмүскээһин иһин» уонна «Германияны кыайыы иһин» мэтээллэрдээх 1945 сыл алтынньыга демобилизацияламмыта. Кэнники Кыайыы үбүлүөйүгэр Аҕа дойду сэриитин иккис степеннээх уордьанынан уонна үбүлүөйдээх мэтээллэринэн бэлиэтэммитэ.

Любовь Николаевна Томпо улууһун киинигэр Хаандыгаҕа 1960 сыллаахха кэлбитэ, сибээскэ үлэлээбитэ. Килбиэннээх үлэтин иһин «СӨ сибээһин үтүөлээх үлэһитэ», «Үлэ бэтэрээнэ» ааттарынан бэлиэтэммитэ. Уоллаах кыыс оҕолоох, түөрт сиэннээх, биэс хос сиэннээх. Оҕолоро билигин бэйэлэрэ пенсионердар. Кини билигин Кыайыы 65 сылыгар бэлэхтээбит таас дьиэҕэ икки хостоох квартираларыгар олорор.

Любовь Николаевна бэйэтин сааһыгар холооно суох эдэр. Кини кырдьаҕастарга аналлаах тэрээһиннэргэ куруук кыттар. Кыайыы күнүгэр хайаан да мэтээллэрин иилинэн кэлэр. Саамай сөбүлүүр дьарыга балыктааһын, онон билигин даҕаны кинини элбэхтик күөгүлээх сылдьарын көрсбт.

Сэрии бэтэрээнин, Томпо улууһун Ытык олохтооҕун чиэстээһин «АЛРОСА» культура уонна спорт киинигэр буолла. Эҕэрдэ тыллары Томпо улууһун баһылыгын социальнай боппуруостарга солб. Петр Новгородов, Хаандыга бөһүөлэгин баһылыга Михаил Алексеев, «Россия ийэлэрэ» бүтүн Россиятааҕы түмсүү улуустааҕы салаатын бэрэссэдээтэлэ, ыччат уонна дьиэ кэргэн политикатын салаатын салайааччыта Оксана Назаренко, бэтэрээннэр сэбиэттэрин бэрэссэдээтэлэ Галина Готовцева уо.д.а. эттилэр. Хаандыга орто оскуолатын уонна гимназия үөрэнээччилэрэ музыкальнай нүөмэрдэри бэлэхтээтилэр. Любовь Николаевнаҕа тыыннаах сибэккилэри, араас сыаналаах бэлэхтэри туттардылар. Бэтэрээн барыларыгар махтанна.

Следите за самым важным и интересным в Telegram-канале и WhatsApp-группе ЯСИА