Тойон Арыыга эр дьон ортотугар сыал ытыыга, турникка тардыныыга, автомат сааны ыһан хомуйууга күрэх буолан ааста.
Быйылгы күрэххэ сыал ытыыга бастакы миэстэни олохтоох уол Валера Григорьев ылла, иккис миэстэ Владик Степанов, үһүс миэстэ — спорду өрө туппут киһибит, аҕам саастаах Иннокентий Кононов буолла.
Автомат сааны хомуйууга 11 кылаас үөрэнээччитэ Аял Лаврентьев тэҥнээҕин булбата, иккис миэстэ Николай Константинов уонна үһүс миэстэҕэ Айсен Рыгунов тигистилэр.
Турникка тардыныы сытыы киирсиитигэр эдэр уолбут Данил Кононов кыайыылаах ааттанна, иккис — Аял Лаврентьев уонна үһүс миэстэҕэ Алексей Петров тигистилэр. Ону таһынан, аҕам саастаахтар ортолоругар дартска муҥутуур кыайыылааҕынан Иннокентий Кононов буолла.
Бу күрэҕи сыл аайы Иван Харитонов иилээн-саҕалаан ыытар. Иван Платоновичка, патриокка, эдэр ыччаты чөл олоххо, спортка көҕүлүүр актыбыыспытыгар махталбытын тиэрдэбит, диэн суруйда Дмитрий Лаврентьев, @gazetahangalas
