Тойбохойдооҕу оҕо дьиэтэ билигин «С.Г. Кривошапкин аатынан Тойбохойдооҕу киин» диэҥҥэ уларыйан, тулаайах уонна көрүүтэ-истиитэ суох хаалбыт оҕолорго көмөлөһөр аналлаах үлэлиир.
Кииҥҥэ 32 иитиллээччи баар. Түөрт тус-туспа дьиэҕэ эйэ дэмнээхтик олороллор. Иитээччилэр бэйэлэрин билиилэринэн, үлэлэринэн, оҕолорго холобур буолаллар. Куруутун бииргэ сылдьан, үлэҕэ, кэрэҕэ, тулуурга үөрэтэллэр, дьиэ кэргэн олуктарын уураллар.
«Оҕо иитиитигэр аналлаах араас хабааннаах тэрээһиннэр мэлдьи буолаллар. Олортон биирдэстэринэн, үгэскэ кубулуйбут, Кырдьаҕас күнүн бэлиэтээһин буолар. Бу тэрээһин нөҥүө биһиги оҕолорбутун кырдьаҕас дьону ытыктыырга, харыстыырга, көмөлөһөргө, амарах сыһыаҥҥа, аһыныгас буоларга үөрэтэбит. Ол курдук уолаттарбыт иитээччи Николай Егоровы кытары кырдьаҕас үлэһит Тамара Трофимовна Жирковаҕа дьиэ таһын үлэтигэр көмөлөстүлэр. Бары биир санаанан көхтөөхтүк үлэлээн, үөрэн-көтөн кэллилэр«, — диэн кэпсиир иитээччи Сахаяна Егорова.
Диана, Егор, Айыына, Саша, Эрчим уонна Алёша урукку сылларга кииҥҥэ үлэлээбит бэтэрээн-кырдьаҕастарга Любовь Егоровна Фёдороваҕа уонна Александра Кирилловна Даниловаҕа дьиэлэригэр тиийэн, бэлэх туттаран, эҕэрдэлээн, сэргэхситтилэр. Оҕолор дьиэҕэ олорор кырдьаҕас киһиэхэ кыра да болҕомто наадатын өйдөөтүлэр.
