«Тирэх» социальнай адаптация киинигэр бастайааннай олорор сирэ суох дьоҥҥо кыһыны атаарыы бырааһынньыга ыытылынна. Бырааһынньыкка 96 киһи кытынна.
Киин дириэктэрэ Саргылана Диодорова эппитинэн, бырааһынньык «Олох маһа» социальнай өйөбүл уонна көмүскэл аһымал фондатын көмөтүнэн тэрилиннэ.
Фонда дириэктэрэ Петр Константинов: «Биһиги фондабыт бастайааннай олорор сирэ суох уонна олох ыарахаттарыгар түбэспит дьон сүтэрбит докумуоннарын хос оҥорорго көмөлөһөр, сылаас таҥаһынан хааччыйар, тиһигин быспакка босхо аһылыгы тэрийэр. Ону сэргэ араас дьаһаллары, судаарыстыбаннай уорганнар үлэһиттэрэ кыттыылаах семинардары ыытар», – диэн фонда үлэтин-хамнаһын билиһиннэрдэ.
Аһымал акциялар сүрүн соруктарынан олох ыарахаттарыгар түбэспит дьону социальнай реабилитациялааһын, чөл олоххо төнүннэрии, уйулҕаларын тупсарыы уо.д.а. буолаллар.
Кыһыны атаарыыны уус-уран самодеятельность артыыстара, СӨ үтүөлээх артыыһа Николай Прокопьев, ырыаһыт Василий Местников уо.да. киэргэттилэр.
