Таатта улууһугар СР экологияҕа, айылҕаны туһаныыга уонна ойуур хаһаайыстыбатыгар министирэ Сахамин Миланович Афанасьев үлэлиир. Бэҕэһээ улууска ыксаллаах быһыыны-майгыны туоратар уонна сэрэтэр боппуруостарга мунньахтаатылар. Улуус салалтата, нэһилиэк баһылыктара, ойуур хаһаайыстыбатын үлэһиттэрэ кыттыыны ыллылар.
Экология миниистирин кытта кэпсэтии халаан уутун этэҥҥэ аһардыы уонна бэлэмнэнии, маны тэҥэ ойуур баһаардарын тула барда. Халаан уутуттан көмүскэнии сүрүн үлэлэрэ Таатта үрэҕинэн уонна Амма өрүс сүнньүнэн ыыттыллара былааннанар. Хараардыы үлэтиттэн саҕалаан, дьон-сэргэ баайын-дуолун харыстааһыҥҥа, өрүс сүнньүн көннөрүүгэ тиийэ араас хайысхалаах үлэ ыытыллыаҕа.
Мунньахха нэһилиэк баһылыктара баар кыһалҕаларын этиннилэр. Таатта улууһугар баар гидротехническэй сооружениеларга, шлюз регулятордарга барыахтаах үлэлэри бырабыыталыстыба хамыыһыйатыттан туруорустулар, маны тэҥэ улуус 10 нэһилиэгэ ууга барар зоналарга киирбиттэрин туһунан боппуруоһу Дьохсоҕон баһылыга П.Е. Захаров туруорда.
Ытык Күөлү халаан уутуттан көмүскээн турар гидротехническэй сооружениены көрүү-истии уустуктарын туһунан Ытык-Күөл баһылыга Е.И. Павлов сырдатта. Санатан эттэххэ, бу улахан иэннээх баараҕай гидротехническэй сооружение Таатта нэһилиэгин бас билиитигэр киирбитэ. Эбийиэги көрүүгэ-истиигэ 4 мөл тахса солк көрүллүөн сөптөөҕүн туһунан уу уонна экологическэй сырдатыы департаменын салайааччыта З.Е. Васильева иһитиннэрдэ. Кэпсэтии түмүгэр бу көрүллэр үп киириитин уонна нэһилиэккэ тиийиитин хонтуруоллаһарга сорук туруорулунна.
Кэпсэтии иккис хайысхатынан ойуур баһаардарын тула барда. Былырыын Тааттаҕа улахан ойуур баһаардара турбуттара, дьон кыстыыр ото уокка былдьаммыта. Күһүн КЧС көһө сылдьар мунньаҕа ыытыллыбыта. Ыксаллаах түгэҥҥэ сөптөөх миэрэлэр ылылланнар, баһаары утары охсуһууга дьайыылаах үлэ барбыта. Отторо былдьаммыт дьон үксүлэрэ хоромньуларын сабынарга көмө ылбыттар, баһаарга мобилизацияламмыт дьон хамнастарын аахсыбыттар.
Мунньах түмүгүнэн боротокуол оҥоһуллан, сааскы халаан уутун этэҥҥэ аһарыыга уонна бэлэмнээх көрсүүгэ, ойуур баһаардарыттан харыстаныыга былааннаах үлэ барыаҕа.
