29 Кулун тутар 29.03
  • -13°
  • $ 92,26
  • 99,71

Тааттаҕа Василий Местников, Дмитрий Саввин депутаттары, баһылыктары кытта көрүстүлэр

14:32, 12 февраля 2018
Текст:
Читайте нас на
Яндекс Новости
ЯДВ

Ил Түмэн олохтоох салайыныы боппуруостарыгар сис кэмитиэтин бэрэссэдээтэлэ Василий Местников, тыа сиригэр уонна аграрнай политикаҕа сис кэмитиэтин бэрэссэдээтэлэ Дмитрий Саввин, норуот депутата Константин Борисов олунньу 9 күнүгэр Таатта улууһун Ытык Күөлүгэр улуус бэрэстэбиитэллээх уорганнарын депутаттарын, нэһилиэктэр баһылыктарын ассоциациятын тэрээһинигэр кыттыыны ыллылар.


Тааттаҕа ыытыллыбыт тэрээһин Саха Автономиятын төрүттээччилэриттэн биирдэстэрэ, уһулуччулаах судаарыстыбаннай, политическай деятель, саха норуотун чулуу уола П.А.Ойуунускай төрөөбүтэ 125 сылыгар ананна. Манна Амма, Чурапчы, Мэҥэ Хаҥалас депутаттарын делегациялара сырыттылар.

Көрсүһүү семинар быһыытынан ыытылынна. Семинары Таатта улууһун депутаттарын Сэбиэтин бэрэссэдээтэлэ Валентин Охотин уонна улуус баһылыга Михаил Соров киирии тылынан астылар.

Биир сыл анараа өттүгэр Дьокуускайга Ил Түмэн тэрийиитинэн Саха сирин бэрэстэбиитэллээх уорганнарын депутаттарын I съеһэ буолбута. Бу съезкэ өрөспүүбүлүкэ бары улуустарыттан 500 делегат мустан, олохтоох салайыныы таһымыгар депутаттар оруолларын уонна статустарын үрдэтэр туһунан киэҥ кэпсэтиини ыыппыттара. Съезд үлэтин түмүгүнэн резолюция ылыллыбыта. Съезд резолюциятын олоххо киллэрии хаамыытын туһунан Ил Түмэн сис кэмитиэтин бэрэссэдээтэлэ Василий Местников мустубут дьоҥҥо кэпсээтэ. Итиэннэ сотору, кулун тутар 1 күнүгэр, Ил Түмэҥҥэ өрөспүүбүлүкэ бэрэстэбиитэллээх уорганнарын сүбэ мунньахтара ыытылларын, ол онно бэлэмнэнии үлэтэ барарын туһунан иһитиннэрдэ.

Ил Түмэн сис кэмитиэтин бэрэссэдээтэлэ Дмитрий Саввин парламент ыытар үлэтин, чугастааҕы соруктар, ханнык сокуоннар барыллара көрүллэллэрин туһунан билиһиннэрдэ. СӨ муниципальнай тэриллиилэрин сэбиэтин толоруулаах директора Дмитрий Горохов тохсунньуга буолбут муниципальнай тэриллиилэр уочараттаах VII съезтэрин резолюциятын туһунан кэпсээтэ.

Салгыы кэпсэтиигэ Ил Түмэн депутата Константин Борисов, СӨ Ил Дарханыгар коррупцияны утары управлениетын салайааччытын солбуйааччы Александр Уаров, Таатта улууһун баһылыгын солбуйааччы Изабелла Сивцева, Чурапчы улууһун депутаттарын Сэбиэтин бэрэссэдээтэлэ Яков Оконешников, Амма улууһун депутаттарын Сэбиэтин бэрэссэдээтэлин солбуйааччы Николай Ксенофонтов уо.д.а. санааларын эттилэр.

Семинар кыттыылаахтара Ытык Күөлгэ П.А.Ойуунускай пааматынньыгар сибэкки уурдулар. Күн иккис аҥарыгар Чөркөөххө СӨ Судаарыстыбаннаһын музейыгар Платон Ойуунускай төрөөбүтэ 125 сылыгар анаммыт быыстапканы көрдүлэр, Октябрьскай нэһилиэк олохтоохторун кытта көрүстүлэр.

Следите за самым важным и интересным в Telegram-канале и WhatsApp-группе ЯСИА
Тутаах тыллар