Өрөспүүбүлүкэ, дойду үрдүнэн бэнсиини, сэлээркэни техникаҕа кутар ыстаансыйаларга хааччахтааһын киллэриллибитэ.
Балаһыанньаны билсээри «Таатта» хаһыат кэрэспэдьиэннэрэ Ытык Күөл АЗС тиийэн, үлэһиттэри кытта кэпсэттибит, суруйда «Таатта» хаһыат МАХ-ханаала.
“Саханефтегазсбыт” АУо ыстаансыйатыгар тиийбиппит массыына бөҕө, үлэ күөстүү оргуйа турар. Баар балаһыанньаны старшай биригэдьиири солбуйааччы Ольга Романовна билиһиннэрдэ:
«Биһиэхэ уматык сыанатыгар саҥа дьылтан бэттэх уларыйыы суох (“АИ-92”- 77,10 солк., “АИ-95”-81 солк, ДТ-96,10 солк.). Бэс ыйын 29 күнүттэн эбии хаарчахтааһын киирдэ. Ол курдук, уматыгы кутуу биир массыынаҕа 30 лиитэрэ, улахан массыыналарга, диизэллэргэ сэлээркэ — 200 лиитэрэттэн ордук кутуллубат буолла, оттон тэрилтэлэргэ хааччахтааһын суох. Уматыгы иһиккэ кутан ылыы бобулунна».
Салгыы “Туймаада-Нефть” АУо НК хампаанньа (АЗС) тэрилтэҕэ тиийдибит. Үлэһит Анна Илларионовна эттэ:
— Биирдиилээн кутууга быстах кэмҥэ ыйыллыбатах болдьоххо хааччахтааһын киирдэ. Иллэрээ күнтэн уматык сыаната үрдээтэ. Ол курдук, эрдэ “АИ-92″ — 80,30 солк., “АИ-95” — 84 солк., ДТ — 97,80 солк. буоллаҕына, билигин “АИ-92″ — 93 солк., “АИ-95” — 96 солк., ДТ — 106 солк.
Массыына уматыктарыгар 30 л элбэх бэриллибэтин, ону таһынан, бонуснай карта тохтоон турарын, итиэннэ таараҕа (канистраҕа, буочукаҕа, о.д.а. иһиттэргэ) хайа да көрүҥэ эмиэ кутуллубатын туһунан иһитиннэрдэ.
