21 Тохсунньу 21.01
  • -48°
  • $ 73,82
  • 83,32

Суут ырыаһыт Николай Донскойга усулуобунай миэрэни анаата

17:25, 12 апреля 2016

Бүгүн, муус устар 12 күнүгэр, Дьокуускай куорат федеральнай суута (судьуйа — Лена Говорова, Сиэйэ Уолун дьыалатын эмиэ кини көрбүтэ) ырыаһыт Николай Донской холуобунай дьыалатын ураты бэрээдэгинэн көрдө.

Суут саалатыгар сууттанааччы, кини интэриэһин көмүскүүр икки адвокат уонна эмсэҕэлээччи өрүт быһыытынан, «Сбербаан» алта үлэһитэ бааллар. Сууттанааччы Донской оҥорбут буруйун толору билинэрин, кэмсинэрин туһунан көрдөрүү биэрдэ, эмсэҕэлээччи кыргыттартан бырастыы гыналларыгар көрдөстө.

Суут быһаарбытынан, бу дьыл олунньу 12 күнүгэр, сарсыарда 11 чааһы ааһыыта Донской киин куорат Богдан Чижик аатынан уулуссатыгар турар «Сбербаан» филиалыгар иитиитэ суох сигнальнай револьвердаах киирэн, куттаан туран, харчы биэрэллэригэр модьуйбут. Бааҥҥа кэлбит дьонтон биирдэстэрэ кинини охторон, бэстилиэтин былдьаан, буруйун тиһэҕэр диэри тиэрдибэтэх. Судаарыстыбаннай буруйдааччы (борокуруор) бу оҥорбут буруйун иһин 3 сылга уопсай режимнээх холуонньаҕа көҥүлү быһары туруоруста. Николай Донской тиһэх тылыгар ис сүрэҕиттэн буруйун билинэрин, аны хаһан да арыгы иһиэ суох буолан тылын биэрдэ.

Суут Николай Донскойу РФ Холуобунай кодексатын 162-с ыст. 1-с чааһынан, ол эбэтэр, талааһыҥҥа буруйдааҕынан билиннэ. Накаастабыл миэрэни аныырыгар, суут кини бастакы сууттаныытын, үчүгэй характеристикалааҕын, икки сокуоннай сааһын ситэ илик оҕолооҕун, буруйун бэйэтэ кэлэн толору билиммитин, чахчы кэмсинэрин учуоттаата. Уонна 4 сыл көҥүлүн быһары усулуобунайынан аахсан, 3 сыл тургутар болдьоххо, 30 тыһ.солк. суумалаах ыстараап төлүүргэ уурда. Маны таһынан, өрөспүүбүлүкэтээҕи наркодиспансерга эмтэтэргэ эбьээһинэстээтэ.

0
0
21 января 21.01
  • -48°
  • $ 73,82
  • 83,32