Суол хаайтарыытын кэмигэр өрүһү туоруурга чэпчэтиинэн туһанар дьон ахсаанын өссө кэҥэтэргэ, ону сөптөөх докумуоҥҥа киллэрэр туһунан ааспыт нэдиэлэҕэ Ил Түмэн экэниэмикэҕэ, инвестиционнай уонна бырамыысыланнай бэлиитикэҕэ сис кэмитиэтин мунньаҕар дьүүллэстилэр, суруйда Саха парламент саайт.
Мунньаҕы сис кэмитиэт бэрэссэдээтэлэ Павел Петров ыытта. Мунньахха салгын олбохтоох оҥочонон дьону таһааччылар «Ленаводсервис» ХЭТ дириэктэрэ Вячеслав Литавин, кылаабынай инженер Олег Лебедев, «Лена-Транс» ХЭТ генеральнай дириэктэрэ Валерий Те, урбаанньыт Николай Высоцкай кытыннылар.
Кинилэр элбэх оҕолоох ыаллар докумуоннарын көрдөхтөрүнэ, утары барыахтарын, чэпчэтиини оҥоруохтарын сөбүн туһунан биллэрдилэр. Павел Петров тарыып кээмэйин олохтуурга урбаанньыттар, биллэн турар, ночоокко үлэлээбэттэрин өйдүүрүн, ол эрэн кинилэр дьону таһарга эмиэ үтүө суобастаах буолуохтаахтарын санатта. Итиниэхэ олоҕуран, норуот дьокутаата чэпчэтиинэн туһанар нэһилиэнньэ испииһэгин чопчулуурга уонна кэҥэтэргэ этии киллэрдэ.
Күн бүгүн Анал байыаннай дьайыы кыттыылаахтарын итиэннэ соҕурууттан кэлбит 200-тээх таһаҕаһы босхо тиэрдэллэр. Ол эрэн хаайтарыы кэмигэр куоракка киирээччи ахсаана аҕыйаабат, ким эрэ балыыһаҕа, суһал наадаҕа тиэтэйэр.
Күн бүгүн маны сүрүннүүр федеральнайдааҕы, эрэгийиэннээҕи сокуон суох, ол иһин аны күһүн бу хайысханан тустаах үлэ ыытыллан, нуормалыыр быраап тирэҕэ оҥоһуллан, ким төһө чэпчэтиинэн туһанара чуолкайданыаҕа.
Василий Кононов хаартыскаҕа түһэриитэ.
