10 сыл анараа өттүгэр Василий Васильев үрдүк үөрэҕи бүтэрэн Дьаархаҥҥа учууталлыы кэлбитэ. Эдэр, эрчимнээх учуутал үөрэтэр оҕолорун бэйэтин тула түмэ тарпыта. Үҥкүүгэ дьарыктаан, ансаамбыл тэрийбитэ. Ансаамбылларын «Одун» диэн ааттаабыттара.
Үгүс дьаныардаах үлэ, дьарык кэнниттэн ансаамбыл улууспутугар, өрөспүүбүлүкэҕэ, Арассыыйаҕа, омук дойдуларыгар ыытыллар күрэхтэргэ, тэрээһиннэргэ ситиһиилээхтик кыттан, төрөөбүт Дьаарханнарын аатын киэҥник ааттаппыттара, ааттаталлар, өссө да ааттатыахтара.
«Одун» оҕо образцовай-фольклорнай үҥкүү ансаамбылыгар хайа күн тэриллиэҕиттэн 90-тан тахса оҕо сылдьан дьарыктанна. Арыт биир сылга тэҥинэн 60-ча оҕо дьарыктана сылдьыбыт кэмнээх. Онон Дьаархан нэһилиэгин оҕото үгүстэрэ үҥкүү дьикти абылаҥар ылларан, уһуйуллан тахсыбыттар диэтэххэ улахан омуна суох буолуо.
Ансаамбыл салайааччыта 9 сылы быһа оҕолору соҕотоҕун дьарыктаан кэллэ. Оттон быйылгыттан култуура коллеһын үөрэнэн бүтэрбит хореограф Матрена Сергеева кэлэн, икки буоллулар. «Одуннар» соторутааҕыта улуус киинигэр «Бартыһаан» култуура киинигэр 10 сыллаах отчуоттуур кэнсиэртэрэ буолла. Манна ансаамбыл кыра уонна улахан бөлөхтөрө сахалыы нарын-намчы, ону сэргэ араас норуоттар үҥкүүлэрин көрдөрдүлэр.
Кэнсиэркэ ааспыт сылларга «Одуҥҥа» дьарыктаммыт, билигин нэһилиэктэригэр, улууска араас тэрилтэлэргэ үлэлии-хамсыы сылдьар выпускниктар, Дьаархан нэһилиэгин киэн туттар ырыаһыттара, үҥкүүһүттэрэ кытыннылар. Ол курдук, Лариса Иванова-Ырыа Дьаархан, Вероника Семенова, Александр Васильев, «Күлүм», «Танцует Якутия» бэстибээл I истиэпэннээх лауреаттара «Сардаана» үҥкүү ансаамбыла кэнсиэри ситэрэн-хоторон биэрдилэр. Кэнсиэр бүтүүтүгэр Дьокуускай куоракка үөрэнэр устудьуоннар оҕо саастарыгар үҥкүүлээн элбэх сиринэн сылдьыбыт, ситиһиилэммит «Одун» ансаамбылларын, салайааччыларын Василий Васильевы видеонан бу бэлиэ күннэринэн эҕэрдэлээтилэр. Маны сэргэ улуустааҕы култуура уонна духуобунай сайдыы, үөрэҕирии управлениелара истиҥ тыллаах эҕэрдэлэрин эттилэр. Бу күннэргэ 85 сааһын туолбут Тойуктаах Маарыйа эдэр салайааччыларга, оҕолорго баҕа санаа бастыҥын, үтүө санаа үтүмэнин этэн, инникитин да өссө сайда, чэчирии туруҥ диэн алҕаата.
