16 От ыйа 16.07
  • 28°
  • $ 87,81
  • 95,78

Сунтаарга киһи быраабын көмүскүүр боломуочунайдар сырыттылар

12:15, 14 октября 2016
Текст:
Читайте нас на
Яндекс Новости
ЯДВ

Сунтаарга СӨ киһи быраабын көмүскүүр боломуочунай аппараатын сотрудниктара кэлэн, олохтоохтору кытары көрсүһэн бардылар. Итини сэргэ оройуоннааҕы Ис дьыала уорганын уонна борокуратуура үлэһиттэрин кытары эмиэ көрүстүлэр.


СӨ киһи быраабын көмүскүүр боло-муочунай аппараатын начаалынньыгын эбээһинэһин толорооччу Д.Д. Фёдоров уонна аппараат старшай референэ И.И. Аргунов улуус үрдүнэн быраабы кэһии хайдах таһымҥа турарын туһунан туоһуластылар. Хоруйдары Сунтаардааҕы полиция начаалынньыга А.Я. Корнилов, Сунтаар оройуонун борокуруора А.Н. Винокуров, итиэннэ улуус баһылыгын социальнай уонна имиджевай бэлиитикэҕэ солбуйааччы У.Д.Попова биэрдилэр. Кинилэр этэллэринэн, атын улуустары кытары тэҥнээтэххэ, Сунтаарга быраабы кэһии 7,6 % аҕыйаабыт. Арыгы атыыланар маҕаһыына 26 нэһилиэктэн 10 нэһилиэккэ баар эбит, олортон 5-һэ Сунтаар нэһилиэгэр бэлиэтэммит. Бу эмиэ куһаҕана суох көрдөрүү диэн Алексей Корнилов иһитиннэрдэ. Итини сэргэ эдэр ыччат, оскуола оҕолоро кыттыылаах охсуһуулар төһө элбэхтик буолалларын туһунан эмиэ ыйыталастылар. Бу урут уруккуттан сытыы боппуруос буолара, ол да буоллар, кэлиҥҥи кэмҥэ охсуһуу улахаҥҥа күөдьүйэ илигинэ кэмигэр тохтотор буоллубут диэн полиция начаалынньыга кэпсээтэ.

Сунтаарга бэрээдэги көрүүгэ уопсастыбаннай тэрилтэлэр, норуот дружиналара (ДНД-лар) көхтөөхтүк үлэлииллэрин туһунан элбэхтик истэбит. Бу туһунан аппараат сотрудниктара эмиэ ыйыталастылар. Быйыл Сунтаардааҕы ОМВД-га 10 дружина учуокка турбут, олортон 2-тэ (Элгээйи уонна Бүлүүчээн) регистрацияны ааспыттар.

Итини сэргэ ИВС (быстах кэмҥэ хаайар изолятор) туһунан эмиэ ыйыталастылар. Кэлэр сылга ИВС дьиэтин өрөмүөннүүргэ 1 мөл. солк. көрүллүбүт. Онон сотору улахан өрөмүөн үлэтэ буолара күүтүллэр диэн полиция начаалынньыга А.Я. Корнилов иһитиннэрдэ. Аппараат сотрудниктара ИВС иһин эмиэ көрдүлэр, хаайыылаахтары кытары илэ көрсөн кэпсэттилэр. ИВС начаалынньыга В.Н. Семенов барытын көрдөрөн биэрдэ. Аһынан, таҥаһынан, суунар тэрилинэн хааччыллыахтаахтар диэн аппараат старшай референэ И.И. Аргунов эттэ. Ити курдук кыра-кыра итэҕэстэри ыйан-кэрдэн биэрдилэр.

Дмитрий Данилович Федоров, СӨ киһи быраабын көмүскүүр боломуочунай аппараат начаалынньыгын эбээһинэһин толорооччу:
Былырыын Үөһээ Бүлүүгэ, Бүлүүгэ сылдьыбыппыт. Быйыл ону ситэрээри Сунтаарга, онтон Ньурбаҕа сылдьыахтаах-пыт. Бастакы сырыыбыт буолар. Киһи быраабын көмүскүүргэ туох-хайдах үлэ барарын билсэ, олохтоохтору кытары кэпсэтэ кэллибит. Итиэннэ быраабы араҥаччылыыр уорганнар киһи быраабын төһө тутуһалларын көрөбүт.

Следите за самым важным и интересным в Telegram-канале и WhatsApp-группе ЯСИА
Тутаах тыллар