Сунтаарга оройуон балыыһатын 100 сылыгар анаан, онно үлэлээн ааспыт дьону үйэтитэр өйдөбүнньүк бэлиэни үөрүүлээхтик аһыы буолла. Үөрүүлээх тэрээһиҥҥэ өр сылларга дьон доруобуйатын харыстабылыгар үлэлээбит бэтэрээннэр, билигин үлэлии сылдьар эмп үлэһиттэрэ муһуннулар.
Улуус дьоно-сэргэтэ, саҥа истиэндэни көрөн-истэн, кэрэхсииллэр. Өр сылларга биһиги доруобуйабытын араҥаччылаабыт үрүҥ аанньалларбыт ааттара-суоллара үйэлэргэ өйдөбүнньүк буолан, солотуулаах көмүс буукубаларынан суруллубуттар. Оҥоһуллуута, тутуута олус үчүгэй, үйэлээх.
Оройуоннааҕы балыыһа 1905 сылтан үлэлээн кэлбит чулуу үлэһит дьонун үйэтитэн өйдөбүнньүк бэлиэни туруорарга үлэлэспит, бастакынан этии киллэрбит оччотооҕу кылаабынай быраас И.В. Поповка, кылаабынай бухгалтер Н.И. Архиповаҕа барҕа махтал тылларын эттилэр. Өйдөбүнньүк бэлиэ тутулларыгар харчынан көмөлөспүт спонсордарга: «Стерх» хампаанньа ген. дириэктэригэр С.М. Березиҥҥа, «Сунтарцеолит» тэрилтэ дириэктэригэр П.М. Поповка, Сунтаардааҕы «ОДьКХ» ГУП дириэктэригэр А.А. Даниловка, «Алмаасэргиэнбаан» дириэктэригэр Э.П. Николаеваҕа, урбаанньыт Т.М. Ордаховка, 28 №-дээх аптека сэбиэдиссэйигэр А.А. Васильеваҕа эмиэ ис сүрэхтэн тахсар сылаас тыллар этилиннилэр.
Бу үөрүүлээх түгэнинэн эҕэрдэ истиҥ тылларын эттилэр: Сунтаар улууһун дьаһалтатын баһылыга А.В.Григорьев, Сунтаар нэһилиэгин баһылыга Э.Е.Филиппов, оройуоннааҕы киин балыыһа кылаабынай бырааһа С.К.Иванова, балыыһа урукку кылаабынай бырааһа, СӨ уонна РФ доруобуйаҕа харыстабылын туйгуна, РФ үтүөлээх бырааһа И.В.Попов, Сунтаар оройуонун Бочуоттаах гражданина, сэрии, тыыл бэтэрээнэ Д.Я.Григорьев кыыһа Л.Д.Уларова.
