28 Кулун тутар 28.03
  • -12°
  • $ 92,59
  • 100,27

Сунтаарга - алын кылаас учууталларын форума

11:59, 01 апреля 2016
Текст:
Читайте нас на
Яндекс Новости
ЯДВ

Сунтаар улууһугар аан бастаан, ФГОС ирдэбилигэр сөп түбэһиннэрэн, алын кылаас учууталларыгар «Деятельностное содержание начального общего образования в условиях ФГОС: реалии и перспективы в рамках года дополнительного образования в РС (Я)» диэн ааттаах региональнай форум тэрилиннэ.

Улахан тэрээһиҥҥэ Сунтаар улууһун бары оскуолаларыттан, Ньурбаттан, Үөһээ Бүлүүттэн, Бүлүүттэн, оннооҕор Дьокуускайтан 38 №-дээх уонна национальнай «Айыы кыһата» оскуолалартан алын сүһүөх кылаас учууталлара, эбии үөрэхтээһин педагогтара, үөрэҕирии тэрилтэтин салайааччылара кэлбиттэр. Бу күн саалаҕа араас пуормалаах 230 учуутал муһунна.

Форум кыттыылаахтарын, ыалдьыттары, араас дуоһунастаах салайааччыларбыт итиитик-истиҥник эҕэрдэлээтилэр: оскуолабыт хаһаайына, дириэктэр А.С.Назаров, муниципальнай оройуон баһылыгын социальнай уонна имиджевай политикаҕа солбуйааччыта У.Д.Попова, үөрэҕирии управлениетын начальнига Г.М.Еремеев, киин куораттан ыалдьыттарбыт «Айыы кыһата» национальнай оскуола дириэктэрэ Л.П.Шамаева уонна Сунтаардааҕы үөрэҕирии управлениетын иһитиннэрэр-методическай отделын кылаабынай специалиһа М.И.Попова. Улууспут киэн туттар, Саха Өрөспүүбүлүкэтигэр, Россия Федерациятыгар билиниини ылбыт бастыҥ учууталларбытын, араас сылларга ПНПО кыайыылаахтарын чиэстээн, кинилэргэ махтанан сценаҕа ыҥырдылар: Элгээйиттэн И.Е.Саввинованы, Сунтаартан Г.В.Новикованы, Л.Ф.Секованы, Саха Өрөспүүбүлүкэтин Ил Дарханын Гранын кыайыылаахтарын: Кутанаттан М.М.Иванованы, Сунтаартан А.А.Семеновы, С.И.Андрееваны, С.Ф.Кривошапкинаны.

Эбиэккэ диэри 11 аһаҕас уруок ыытылынна. Ньурбаттан кэлбит Туйаара Апросимова, Любовь Кривошапкина, Сунтаартан Люция Алексеева, Александра Семенова, Бүлүүттэн Мария Михайлова о.д.а. бэйэлэрэ эрдэттэн бэлэмнээбит уруоктарын биэрдилэр. Кылаастарынан кэрийэ сылдьан көрдөххө-иһиттэххэ, бииртэн биир учуутал аһаҕас уруога үчүгэй курдук. Аһаҕас уруоктар хайдах ыытыллыбыттарын: ситиһиилэрин, итэҕэстэрин туһааннаах учууталлар бэрэбиэркэлээтилэр, анал бланканы толордулар. Эбиэт кэнниттэн үөрэх тас өттүгэр эрчиллиигэ 12 аһаҕас уруок буолла. Сунтаартан английскай тыл учуутала Ангелина Николаева, Күүкэй оскуолатыттан Олимпиада Федорова, Варвара Спиридонова, Сиэйэттэн Октябрина Максимова, Антонина Иванова аһаҕас уруоктары ыыттылар. Эмиэ киһи кэрэхсиирэ, уопут ылара элбэх. Ити кэнниттэн 12 учуутал маастар-кылаастары тэрийдилэр. Уопут атастаһа кэлбит биир идэлээхтэрэ Сунтаардааҕы коррекционнай оскуола дириэктэрэ А.С.Игнатьева «Күммүт тэҥҥэ тыгыахтын» маастар-кылааһыгар көхтөөхтүк кытыннылар.

Форум түмүгэр ХИФУ иһитиннэрэр-биллэрэр отделын сэбиэдиссэйэ Н.И.Захарова, «Айыы кыһата» национальнай оскуола дириэктэрэ Л.П.Шамаева «төгүрүк остуолу» тэрийэн ыыттылар. Биир идэлээхтэр бэйэлэрин уопуттарын үллэһиннилэр, санаа атастастылар. Дьэ, ити курдук, ыытыллыбыт бастакы региональнай форумтан ыччаттарбытын, оҕолорбутун иитиигэ, үөрэтиигэ акылаатын түһэрэр алын сүһүөх оскуола учууталлара тэрээһиниттэн улаханнык астынан, үөрэн-көтөн, билиилэрэ-көрүүлэрэ элбээн, харыс үрдээн бардылар.

Следите за самым важным и интересным в Telegram-канале и WhatsApp-группе ЯСИА