Сунтаардар Дьокуускай куоракка олорор биир дойдулаахтара Егор Ефимов Элгээйи 8 кылаастаах интэринээт оскуолатыгар, онтон Элгээйи орто оскуолатыгар үөрэммитэ. Юрист үрдүк үөрэҕин бүтэрэн, 27 сыл өрөспүүбүлүкэ Ис дьыалатын уорганыгар үлэлээбитэ. Нам, Горнай, Томпо улуустарын Ис дьыалаҕа отделларын салайбыта, министиэристибэ аппараатыгар эмиэ үлэлээн, полиция полковнига званиелаах бочуоттаах сынньалаҥҥа тахсыбыта. Милиция туйгуна, Арассыыйа Ис дьыалаҕа министиэристибэтин бочуоттаах сотруднига.
Егор Ефимов араас таhымҥа үлэлии сылдьан, физкультура уонна успуорт хайысхатыгар болҕомтотун күүскэ уурара, кини салайар кэлэктиибэ араас күрэхтэhиилэргэ мэлдьи кыайыы-хотуу аргыстааҕа. Ордук Нам улууhугар үлэлии сырыттаҕына биир идэлээхтэрэ, өрөспүүбүлүкэ биллиилээх спортсменнара Эверстов С.И. уонна Эверстова Н.В. дьарыктааннар, буулдьанан ытыыны умсугуппуттара. Онтон ыла буулдьанан ытыыны таптаан, бочуоттаах сынньалаҥҥа тахсан баран, араас таhымнаах күрэхтэhиилэргэ кыттар, ситиhиилэнэр. Ол курдук, быйылгы сылын «Динамо» спортивнай уопсастыба иhинэн ыытыллыбыт Арассыыйаҕа буулдьанан ытыы успуордун 125, Саха Өрөспүүбүлүкэтэ төрүттэммитэ 100 сылларыгар анаммыт буулдьанан ытыыга күрэхтэhиититтэн саҕалаата. Манна өрөспүүбүлүкэ быраабы араҥаччылыыр бары уорганнарын бэтэрээннэрэ кытыннылар.
Бу күрэхтэhиигэ биир дойдулаахтарбыт ИДьМ бэтэрээннэрэ, астаапкаҕа сылдьар полиция полковнига Егор Ефимов уонна Ис сулууспа подполковнига Екатерина Сергеева револьверынан ытыыга ситиhиилээхтик кыттан, хамаанданан бастаабыттар. Екатерина Сергеева эр дьону баhыйан үрүҥ көмүс призер буолла.
Ол иннинэ Дьокуускай куорат бэтэрээннэрин бэстилиэтинэн ытыыга күрэхтэhиитигэр Егор Ефимов бэйэтин бөлөҕөр иккис, Екатерина Сергеева бастакы миэстэ буолбуттар.
Егор Ефимов икки сыллааҕыта бэйэтин саастаахтарыгар ГТО нормативтарын кыhыл көмүс бэлиэҕэ туттаран, Арассыыйа успуорка миниистириттэн анал бэлиэ тутан үөлээннээхтэрин соhуталаан турар. Бириэмэҕэ скандинавскай хаамыыга өрөспүүбүлүкэҕэ иккис миэстэ буолан турар.
Дьэ, ити курдук 58 саастаах биир дойдулаахпыт Егор Ефимов чөл олоҕу тутуhан, физкультураны, успуорду кытта доҕордоhон, этин-сиинин эрчийэн сылдьар.
Ааптар: Иван Чагдинскай, Сунтаар улууһа, «Сунтаар сонуннара» хаһыат.
