19 Тохсунньу 19.01
  • -48°
  • $ 73,82
  • 83,32

"Сахаэнерго" үөрэх туурун саҕалаата

09:55, 19 февраля 2016
Текст:

«Сахэнерго» Хотугулуу-Илиҥҥи федеральнай университет физико-техническай институтугар энергетик идэтигэр үөрэнэр бастакы куурус устудьуоннарын тэрилтэ производственнай киинигэр уонна дизельнэй , итиэннэ электрооборудование музейыгар ыҥыран сырытыннардылар.


«Үөрэх туура» диэн ааттаах сонун тэрээһин музейтан саҕаланна. Манна Аҕа дойду сэриитин иннинээҕи кэмтэн саҕалаан араас сыллааҕы дизель-генератордар, уот трансформатордара бааллар. Дизельнэй энергетикэ историята түмүллүбүт Саха сиригэр соҕотох музей «Сахаэнерго» 15 сыллаах үбүлүөйүн көрсө тэриллибитэ. Ураты уруок лекторынан тэрилтэ биир уопуттах үлэһитэ, производственнай киин дириэктэрэ Владислав Пак буолла. «Биһиги саҥа кадры бэлэмнээһиҥҥэ үөрүүнэн кыттыһабыт. Улуустардааҕы салааларбытыгар билиилээх уонна үөрэхтээх эдэр специалистар олус наадалар. Энергетикэ ыччаты кыаҕын арыйар, сайыннарар олус интэриэһинэй эйгэ» — диир кини.

Аныгы кэм энергетикэтин туһунан уруок тэрилтэ производственнай киинигэр салҕанна. Манна сана электростанция састаабыгар хоту улууска тиэрдиллиэхтээх дизель-генератордары көрдөрдүлэр уонна уматыгы харайар емкоһы таҥар үлэни сырдаттылар. Ыччат дьон «Сахаэнерго» тутар модульнай автоматизированнай дизельнэй электростанцияларын тутуу уонна үлэлэтии болдьоҕун, омук уонна Россия оборудованиетын уратыларын, хоту улууска уматыгы тиэйиини интэриэһиргээн ыйыттылар.

Максим Корнилов, устудьуон: «Мин «Сахаэнерго» үлэтин олус биһирээтим. Дизельнэй оборуование, электростанцияны тутуу туһунан кинигэттэн эрэ билэбин. Оттон манна кэлэн илэ көрдүм. Энергетиктэртэн бүгүн үгүс саҥаны биллим».

Денис Петров: «Хоту улууска уматыгы тиэйэр уустук үлэттэн сөхтүм. Холобура бу саҥа оҥоһуллубут уматыгы харайар улахан емкоһы илдьэр да ыарахан буолсу. Бүгүн үөрэнэ сылдьар идэм ыараханын биллим, ол эрээри куттамматым, энергетик буолар баҕам өссө күүһүрдэ».

«Сахаэнерго» үлэһиттэрэ устудуьуоннары производственнай практикаларыгар ыҥырдылар. «Энергия» эдэр энергетиктэр биллиилээх этэрээттэригэр тэрилтэ хамнас төлүүр, айан ороскуотун уйунар, уопуттаах уһуйааччыларга сыһыарар.

Салгыы муус устарга «Сахаэнерго» үлэтин энергетик идэтигэр үөрэнэр үрдүкү куурус устудьуоннара билсиэхтэрэ.

«Сахаэнерго» пресс-сулууспата иһитиннэрэр.

0
0
19 января 19.01
  • -48°
  • $ 73,82
  • 83,32