27 Тохсунньу 27.01
  • -48°
  • $ 73,82
  • 83,32

"Сахабэчээт" акцията Кэбээйигэ табылынна

11:16, 21 марта 2016
Текст:

Кулун тутар 15-17 күннэригэр «Сахабэчээт» автономнай тэрилтэ сүрүн дириэктэрэ Филипп Пестряков салалталаах айар бөлөх Кэбээйи улууһугар Кэбээйи, Мастаах уонна Мукучу олохтоохторун кытта көрүстэ, сурутуу хампаанньатын тэрийэн ыытта.


Нэһилиэк баһылыктара Иван Кобяков (Кэбээйи),  Аркадий Гурьевы (Мастаах),  Анна Сысоева (Мукучу) бөлөх салайааччытыгар Филипп Пестряковка нэһилиэк олоҕун-дьаһаҕын, ситиһиитин, кыһалҕатын туһунан билиһиннэрдилэр.

Оттон Россия Суруйааччыларын сойууһун чилиэннэрэ Былатыан Ойуунускай аатынан судаарыстыбаннай бириэмийэ лауреата Николай Винокуров-Урсун уонна «Чолбон» сурунаал салаатын эрэдээктэрэ Иван Осипов-Уйбаан Ойуур оскуолаларга, бибилэтиэкэлэргэ сылдьан, айар түмсүү чилиэннэрин кытта көрсөн ирэ-хоро сэһэргэстилэр, ыйытыыларыгар эппиэттээтилэр.

Саха сирин билийээргэ чөмпүйүөнэ Евгений Баишев спорт бу көрүҥүн таптааччыларга маастар-кылаас ыытта уонна олохтоохтору кытта табаарыстыы көрсүһүүгэ кытынна. Олохтоохтор скандинавскай хаамыыга норуоттар икки ардыларынааҕы федерация инструктора Айталина Третьякова чөл олох уонна хаамыы туһунан кэпсээнин, сүбэтин-аматын сэргээн иһиттилэр. Скандинавскай торуосканан сөпкө хаамарга, тыынарга үөрэтиитин ылыннылар уонна кини илиититтэн хаамыы туһунан кинигэ туттулар.

Олохтоохтор култуура колледжын устудьуоннара Семен Васильев-Арылхан уонна Афанасий Новоприезжай алыптаах куоластарын, бэртээхэй ырыаларын сөбүлээн истэн, лотереяҕа оонньоон, сурутуу акциятыгар кыттан улахан дуоһуйууну ыллылар. «Сахабэчээт» тэрилтэ үлэһиттэрэ кэнсиэргэ көхтөөхтүк кытыннылар. «Забота-Арчы» хаһыат эрэдээктэрэ Александр Лукин-Сандалы ырыа ыллаата, биллиилээх суруйааччы Николай Винокуров-Урсун попурри толордо, «Чолбон» сурунаал эрэдээктэрэ Иван Осипов-Уйбаан Ойуур хомуска оонньоото.
««Сахабэчээт» акцията табылынна. Дьон санаата кэлэн биһиги бородууксуйабытын атыыласта, икки хаһыаппытыгар, үс сурунаалбытыгар балачча элбэх киһи суруттарда. Саамай үчүгэйэ сылдьыбыт үс нэһилиэкпит баһылыктарын кытта бииргэ үлэлииргэ дуогабар түһэрсиитэ буолла. Ким улуустары кэрийэр, атах тэпсэн олорон кэпсэтэр, ол ситиһиилэнэр кэмэ кэлэн турар», — диэн түмүк оҥордо Филипп Пестряков.

0
0
27 января 27.01
  • -48°
  • $ 73,82
  • 83,32