Делегация састаабыгар Саха Өрөспүүбүлүкэтин суруйааччыларын сойууһун бэрэссэдээтэлэ, саха норуодунай поэта Иван Мигалкин, кини солбуйааччыта “Полярная звезда” сурунаал сүрүн редактора Владислав Доллонов, Саха сирин Суруйааччыларын сойууһун бэрэссэдээтэлин солбуйааччы, “Чолбон” сурунаал сүрүн редакторын солбуйааччы Гаврил Андросов, Россия улахан литературнай бириэмийэтин лауреата Баһылай Харысхал, П.А. Ойуунускай аатынан судаарыстыбаннай бириэмийэ лауреата Елена Слепцова-Куорсуннаах, эбээн биллиилээх поэта Василий Кейметинов-Баргачан, СӨ культуратын үтүөлээх үлэһитэ Наталья Михалева-Сайа, поэттар Мария Алексеева-Решетникова уонна Яна Байгожаева, прозаик Иван Тарабукин, “Бичик” НКК сүрүн редактора Валерий Луковцев, СӨ Культураҕа уонна духуобунай сайдыыга министерствотын үлэһиттэрэ Антонина Захарова уонна Павел Яковлев бааллара.
“Хараабылтан – баалга” диэн өс хоһоонугар этиллэринии, тохсунньу 14 күнүгэр тиийээт да суруйааччылар И.С. Тургенев аатынан библиотекаҕа сылдьан автографтаах кинигэ бэлэхтээтилэр, киин куорат биир бөдөҥ библиотекатын үлэтин-хамнаһын кытта билистилэр.
Сарсыҥҥытыгар күнүстэн киэһэ Саха Өрөспүүбүлүкэтин бастайааннай бэрэстэбиитэлистибэтин конференц-саалатыгар Саха сирин норуоттарын литературатыгар анаммыт “төгүрүк остуол” ыытылынна. Бу Россия национальнай литературатын сайдыытыгар сыһыаннаах дьоһун кэпсэтиини таһаарбыт тэрээһиҥҥэ саха суруйааччыларын сэргэ, Россия Суруйааччыларын сойууһун бырабылыанньатын чилиэннэрэ: Николай Переяслов, Вячеслав Куприянов, Василий Дворцов, Игорь Шилейко, Василий Попов о.д.а. бырабылыанньа бастакы сэкирэтээрэ Геннадий Иванов салалтатынан кэлэн кытыннылар. Ол түмүгэр “төгүрүк остуол” таһыма лаппа үрдээтэ. Өр кэмҥэ дойду литературнай процеһын сүрүннэспит Геннадий Викторович Россия литературатын билиҥҥи туругун уонна национальнай литературалар тустарынан санаатын үллэһиннэ, саха литературатын кэнники сылларга ситиһиилэрин бэлиэтээтэ.
Ону тэҥэ Саха сириттэн төрүттээх литератордар – Россия Суруйааччыларын сойууһун Москва куораттааҕы салаатын чилиэннэрэ Юрий Остапенко, Алексей Чертков, о.д.а., “Общеписательская литературная газета” сүрүн редактора, П.А. Ойуунускай аатынан судаарыстыбаннай бириэмийэ лауреата Владимир Федоров көҕүлээһининэн кэлэн санааларын үллэһиннилэр. “Төгүрүк остуол” ытык мааны ыалдьытынан саха судаарыстыбаннаһын төрүттэспит Максим Аммосов кыыһа Лена Максимовна буолла.
Сити күн Россия бөдөҥ поэттарын уонна Саха сирин суруйааччылара кыттыылаах поэзия биэчэрэ бэрт истиҥник барда. Саха суруйааччыларын бастайааннай бэрэстэбиитэл Алексей Стручков эҕэрдэлээтэ уонна өйдөбүнньүк бэлэхтэри туттарда.
Тохсунньу 16 күнүгэр суруйааччылар Л.Н. Толстой музейыгар ыалдьыттаатылар, Саха сирин музейдарыттан кэлбит көс быыстапканы – Лев Толстойдуун доҕордоспут саха бырааһа Прокопий Сокольниковка уонна импровизатор-поэт Кыыл Уолугар анаммыт экспозициялары көрдүлэр. Делегация аатыттан “Бичик” НКК сүрүн редактора Валерий Луковцев музейга Лев Толстой сахалыы тахсыбыт “Оҕолорго” диэн кинигэтин бэлэхтээтэ.
