24 Ыам ыйа 24.05
  • -7°
  • $ 104,68
  • 115,6

Саха сирэ уонна Иркутскай уобалас өрүс флотун уонна өрүстэр түгэхтэрин дириҥэтэр тиэхиньикэлэри саҥардары кэпсэттилэр

13:01, 30 октября 2020
Текст:

Хоту өрүстэрин түгэхтэрин дириҥэтии – өрөспүүбүлүкэҕэ РФ Арктическай зонатын сайыннарыы стратегиятын биир сүрүн салаатынан буолар. Саха сирин салалтата, Иркутскай уобалас уонна Росморречфлот Экспертнэй сэбиэтэ өрүс флотун уонна өрүстэр түгэхтэрин дириҥэтэр тиэхиньикэлэри уларыта тутуу, саҥардыы туһунан кэпсэтии ыыттылар. Кыттыгас мунньахха навигация түмүгүн таһаардылар.


Бырабыыталыстыба бэрэссэдээтэлин э.т. Андрей Тарасенко быйылгы навигация пандемиянан эрэ буолбакка, Алдан, Амма, Бүлүү, Яна өрүстэригэр уу таһыма намыһаҕынан бэлиэтэннэ диэтэ. «Баар ыарахаттары аахсыбакка, хоту таһаҕаһы тиэйии бары кыттыылаахтарын көмөтүнэн, былааннаммыт үлэ толору туолла», — диэтэ премьер.

Барыта 1 мөл 565 тыһ. туонна таһаҕас тиэллибит, итинтэн 1 мөл 084 тыһ. туонната — олоҕу хааччыйар сүрүн таһаҕас.

Мунньах кыттыылаахтара Өлүөнэ бассейнын уу суолларын ис туругун көрүү, суудуналар сылдьар усулуобуйаларын тупсарыы тула кэпсэттилэр уонна кыттыгас үлэлииргэ быһаарыннылар.

Алтынньы 26 күнүгэр РФ бэрэсэдьиэнин ыйааҕынан РФ Арктическай зонатын сайыннарыы уонна 2035 сылга диэри куттал суох буолуутун стратегиялара бигэргэннилэр. Маныаха сүрүн болҕомто Хотугу муора суолун сайыннарыыга туһуланар. Стратегия чэрчитинэн Саха сирин Анаабыр, Өлүөнэ, Яна, Индигиир уонна Халыма өрүстэрин түгэхтэрин дириҥэтиэхтэрэ, Анаабыр, Яна, Индигиир, Халыма, Өлүөнэ өрүстэрин аттыгар баар сирдэри биир кэлим сайыннарыахтара.

Следите за самым важным и интересным в Telegram-канале и WhatsApp-группе ЯСИА
0
0