Соторутааҕыта киин куоракка «Арчы» дьиэтигэр ырыаһыт, мелодист Ион Гоголев—Чочу Уола Дьуон төрөөбүтэ 55 сылыгар «Олоҕум угуйар биһигэ» ырыа күрэҕэ буолан ааста.
Бүлүү Чочутуттан төрүттээх, ис-иһиттэн сырдык эйгэлээх, көнө-көрсүө майгылаах, ис киирбэх ырыалардаах Ион Гоголев күн сирин чаҕылхайдык сырдатан ааспытын туһунан бары ахтан-санаан аастылар.
Дьокуускай куорат норуот айымньытын дьиэтин салайааччыта Ньургуйаана Ушницкая И.Гоголевы кытары алтыһан баран, бу олоххо «табыллар» эбэтэр «табыллыбат» диэн суоҕун өйдөөбүтүн туһунан кэпсээтэ. Ол курдук, Ион Михайлович киһи баҕа санаатын толороругар дьулустаҕына, тугу барытын кыайар кыахтааҕын олорбут олоҕо туоһулуур.
Чочу нэһилиэгин баһылыга Петр Догоюсов «Арчы» дьиэтигэр улахан кылаатын киллэрсибит, элбэх ансаамбылга ылбаҕай ырыаларын бэлэхтээбит күүтүүлээх киһи Чочу Уола Дьуон кинилэр биир дойдулаахтара буоларынан киэн туттарын туһунан долгуйан туран эттэ.
Ион Гоголев кэнники сылларга «Арчы» дьиэтигэр таһаарыылаахтык үлэлээбитэ. Ырыа айарын сэргэ элбэх ансаамбылы тэрийэн, көрөөччүлэр дьүүллэригэр таһаарбыта. Ол туоһутунан кини аатынан ыытыллыбыт ырыа күрэҕэр кыттыбыт ансаамбыллар буоллулар.
Күрэххэ Мэҥэ Хаҥаластан, Кэбээйиттэн, Үөһээ Бүлүүттэн, Дьокуускайтан кытыннылар. Кыттааччылар сааскы таммаҕы санатар ураты иһирэх куоластаах, намыын-намчы матыыптаах ааптар «Күөрэгэйдээх халлааммыт», «Үтүө күн», «Тэтэркэй соноҕостор», «Мин Чочум», «Куллатыыга», «Өттөөххө» уо.д. а. ырыалары толордулар.
Күрэҕи «Арчы» дьиэтин салайааччыта Валентина Бочонина тэрийэн ыытта. Раиса Винокурова салайааччылаах дьүүллүүр сүбэҕэ Ион Гоголев огдообото Марианна Гоголева, СӨ култууратын үтүөлээх үлэһиттэрэ Алексей Калининскай уонна Николай Прокопьев үлэлээтилэр.
Бириистэри «Арчы» дьиэтэ, Чочу нэһилиэгэ, Марианна Гоголева, Иван Неустроев, Егор Иванов, Валентина Бочонина, Борис Михайлов, ырыаһыт бииргэ үөрэммит оҕолоро туруордулар. Үлэ бэтэрээнэ, СӨ култууратын үтүөлээх үлэһитэ, 80 саастаах Анна Данилова 5 тыһыынча суумалаах анал бирииһи туттарда.
Чочу Уолун кэргэнэ Марианна Гоголева: «Олоҕум аргыһын дойдутуттан бүтүн автобус дьон кэлбититтэн олус долгуйдум. Кинилэри баһылык Петр Догоюсов уонна Галина Каменева салайан аҕаллылар. Кэргэним бииргэ үөрэммиттэригэр, Ньурба улууһун Чаппандатыттан Ивановтар, Алексеевтар дьиэ кэргэттэригэр, Чочу нэһилиэгин баһылыга П.Я.Догоюсовка, «Якутск свадебный» фотостудия дириэктэрэ Егор Ивановка, СӨ үтүөлээх үлэһитэ Анна Даниловаҕа, «Арчы» дьиэтин салайааччы Валентина Бочонинаҕа, методист Борис Михайловка, үөрэппит оҕото Сардаана Егороваҕа, И.Г.Неустроевка, бииргэ төрөөбүттэригэр, доҕоро, ыала В.М.Ивановка уо.д.а. махталбын тириэрдэбин», – диэн истиҥ тылларын тириэртэ.
Кыайыылаахтар:
«Дьүрүскэн куолас» — Мария Чиряева (Чочу с.);
«Ылбаҕай ырыаһыт» — Павел Михайлов, Иннокентий Варламов дуэттара;
“Көрөөччү-истээччи биһирэбилэ» — Анастасия Ушканова, Егор Иванов;
“Кэскиллээх толорооччу» — Вика, Надя Федоровалар;
«И.М.Гоголев ырыатын бастыҥ толорооччу» — Дьулустаан Михайлов (Тиэлиги, Мэҥэ-Хаҥалас);
Гран-при – «Уолан» уолаттар ансаамбыллара (салайааччы Галина Егорова, Чочу нэһилиэгэ).
Лауреаттар:
(бөлөҕүнэн толорууга):
I cтепеннээх лауреат – “Өрөгөй» эр дьон ансаамбыла (салайааччы СӨ культуратын үтүөлээх үлэһитэ Валерий Иванов, «Арчы» дьиэтэ);
II степеннээх лауреат – “Сэргэ» эр дьон ансаамбыла, (салайааччы Петр Догоюсов,Чочу);
III степеннээх лауреат – “Чараҥ» дьахталлар ансаамбыллара (салайааччы Валерий Иванов, «Арчы» дьиэтэ»).
Биирдиилээн толорууга:
I-III cтепеннээх лауреаттарынан Мирабелла Ядреева, Федор Варфоломеев (Чочу), Иннокентий Софронов (Нам, 1-кы Хомустаах) буоллулар.
I-III степеннээх дипломнар Петр Догоюсовка (Чочу), Инга Говороваҕа (Чурапчы, Чыаппара), Семен Менкяровка (Чочу) туттарылыннылар.
Кыттааччылар күрэскэ кыттыбаттарын туһунан туоһу суруктарынан бэлиэтэннилэр.
