«Саҥа ырыа» 9-с сезонун кыайыылааҕынан Эбээн-Бытантай улууһун Дьарҕалааҕыттан Михаил Рожин буолбута. Кини бу күннжргэ «Новая Звезда» Арассыыйатааҕы бырайыакка кыттыыны ылар.
СИА-ҕа анаан Михаил Рожин маннык кэпсээтэ:
— Бу күрэххэ «Завод» студия аатыттан кыттыыны ыла, Саха сирин чиэһин көмүскүү сылдьабын. Дойдубар Дьарҕалаахха үлэлии сырыттахпына, Ньургуйаана Яковлева телефоннаан күрэх-бырайыак туһунан кэпсээбитэ. Кыттарбар этии киллэрбитэ. Мин тутатына сөбүлэспитим. Билигин «Завод» студияҕа артыыһынан-ырыаһытынан үлэлиибин. Бу студия хас да хайысхалаах үҥкүүттэн ураты сотору кэминэн ырыа студиятын арыйыахтаах.
Михаил кэпсииринэн, «Новая Звезда-2020» Арассыыйатааҕы бырайыакка маҥнай онлайн-кастиҥҥа ырыаларын суруллууларын, видеолары, хаартыскалары ыыппыт. Онтон аҕыйах кэминэн тэрийээччилэр эрийэн сүүммэрдээһини аастыҥ диэн үөрдүбүттэр.
Эдэр киһи күүскэ бэлэмнэнэн баран, балаҕан ыйыгар күүстээх истиилэри ааһан, бастакы түһүмэх уһуллуутугар кыттыбыт. Билигин таҥыллан, ахсынньыга «Звезда» ханаалга көстүөхтээх.
«Биллэн турар, биһиги кыттааччылар маҥнайгы этаап түмүгүн билэбит, ол гынан баран быраабыла быһыытынан көстө илигинэ кэпсиирбит көҥүллэммэт. Бырайыак продюсердара мин ыыппыт ырыаларбыттан «Күндэлэс» бэйэм тылбар уонна матыыппар ырыаны талан, маны толор диэбитэ«, — диир Михаил.
Ырыаһыт үөрүүтгэр «Күндэлэс» ырыата «Үрдэл» биримэйиэҕэ талыллан, бастыҥ ырыалар испииһэктэригэр киирбит. Инстаграм ситимигэр «Тэтим» араадьыйа сирэйигэр киирэн Михаил толоруутугар куоластыаххытын сөп
Ыспыраапка:
«Новая Звезда» Арассыйатааҕы бырайыак 2015 сылтан сылын аайы «Звезда» телеханаал көҕүлэээһининэн ыытыллар. Быйыл Арассыйа 85 эрэгийиэниттэн бары кыттааччы баар буолара музыка күрэҕин историятыгар аан маҥнайгытын буолара бэлиэтэнэр. Биир сыанаҕа ырыаһыттар уонна анал кыттааччы «Новая Звезда. Твой Шанс» күрэх кыайыылааҕа Карина Арбельяни күөн көрсүөхтэрэ. Көрөөччүлэр куоластааһыннара уонна муусука эйгэтигэр биллэр экспертэр бастыҥ вокалист кимин быһаарыахтара.
Ааптар: Яна Рожина, Эбээн-Бытантай улууһа
