Олунньу 1 күнүгэр Дьокуускай куораттан «Үһүс саас оскуолата» түмсүү чилиэннэрэ Уус Алдан улууһун Бороҕон нэһилиэгэр кэлэн, бэрт сэргэх тэрээһини ыыттылар.
Ыалдьыттар бөлөхтөрүн тумуллар биир дойдулаахтара Людмила Прокопьева салайан аҕалбыт. Куорат кырдьаҕастара тыа сирин олохтоохторун иискэ, тириини таҥастааһыҥҥа, оҕуруону тиһиигэ, сылгы кылынан баайыыга, доруобуйаны чиҥэтэр массажка маастар-кылаастары ыытан, тустаах сүбэлэри биэрэн, санаа атастаһан, тэрээһин бэрт үрдүк таһымҥа ыытылынна.
Бу күн Тумул эрэ олохтоохторо буолбакка, ыаллыы сытар Суотту нэһилиэгиттэн кэлэн үс «Үһүс саас оскуолаларын» түмэр көрсүһүү буолла.
Маастар-кылаастарга нэһилиэктэн 60-ча кэриҥэ киһи сылдьан, элбэххэ үөрэнэн үөрүүлэрэ үрдүк.
Экоздоровье (Су Джок) салайааччыта Ксения Иванова туочуканан массажка, эти-сиини эрчийиигэ, Саргылана Габышева кылтан, быаттан, Нина Артамонова (Кабошон) араас күндү таастартан, оҕуруоттан оҥоһуктарга үөрэттилэр, Мария Константинова тириини таҥастааһыҥҥа, лиэнтэнэн быысыпкаҕа, уус-уран-прикладной улэҕэ маастар-кылаастары ыытта.
Түмүккэ Роман Степанов салайааччылаах «Ырыа кыыма» түмсүү мустубут дьоҥҥо «Ырыа — үөрүү кыыма» диэн эҕэрдэ биэчэри бэлэхтээтэ. Бииртэн биир кэрэ куолас, бииртэн биир саҥа үҥкүү көрөөччү сүргэтин көтөхтө. Мустубут дьон салгыы бииргэ үлэлэһэргэ сүбэлэһэн үөрэн-көтөн тарҕастылар.
