30 Кулун тутар 30.03
  • -16°
  • $ 92,37
  • 99,53

Сүүйүүлээх оонньуулары тэрийии иһин биэс холуобунай дьыала тэрилиннэ

16:33, 29 июня 2017
Текст:
Читайте нас на
Яндекс Новости
ЯДВ

Сайтпытыгар бу дьыл муус устар 19 күнүгэр «Ааспыт сылга 53 сүүйүүлээх оонньуулар саалаларын саппыттар» диэн матырыйаалым бэчээттэммитэ. Онно ис дьыала уорганнара 2011 сылтан саҕалаан, бүгүҥҥү күҥҥэ диэри өрөспүүбүлүкэ үрдүнэн 439 сүүйүүлээх оонньуулар саалаларын булан уодьуганнаабыттарын уонна бу хайысхаҕа билигин быһыы-майгы хайдаҕын туһунан суруллубута.


Бүгүн СӨ ИДьМ-тын пресс-сулууспата иһитиннэрбитинэн, СӨ Ис дьыалаҕа министиэристибэтин Экономическай буруйдары уонна хоруупсуйаны утары охсуһар управлениета булбут матырыйаалларынан, бу сыл бастакы кыбаарталыгар силиэстийэ уорганнара 5 холуобунай дьыала тэрийбиттэр. РФ Холуобунай кодексатын 171.2.-с ыстатыйатынан, ол эбэтэр, сүүйүүлээх оонньуулары тэрийии уонна ыытыы бэлиэтэ баарынан.

Борокуратуура уорганнарыгар оонньуур тэриллэри суох оҥоруу туһунан быһаарыы ыларга, 19 матырыйаалы ыыппыттар.

Оннук сокуоннайа суох оонньуур саалалары Дьокуускай куоракка, Нерюнгрига, Мирнэйгэ, Ленскэйгэ, Өймөкөөҥҥө, Хаҥалас улууһугар уонна Мэҥэ Хаҥаласка булбуттар.

Полиция бэлиэтииринэн, холуобунай дьыалаҕа тэрийээччи эрэ буолбакка, манна үлэлиир дьон бары — харабыл, хонтуруоллааччы, администратор — холуобунай эппиэтинэскэ тардыллаллар.

Оттон СӨ Борокуратууратын пресс-сулууспата иһитиннэрбитинэн, биир оннук дьыалаҕа, Дьокуускай куорат 26 саастаах олохтооҕор суут уурааҕа тахсыбыт.

Суут быһаарбытынан, бу дьахтар 2017 сыл муус устар 5 күнүттэн сокуоннайа суох оонньуур саалаҕа администраторынан үлэлээн саҕалаабыт. Бу саалаҕа 15 ооннньуур аптамаат баар эбит. Муус устар 11 күнүгэр сааланы полиция үлэһиттэрэ булан саппыттар.

Сууттанааччы дьахтар буруйун толору билиммит.

Силиэстийэ уорганнара кини силиэстийэҕэ көмөлөспүтүн, урут сууттана сылдьыбатаҕын, икки кыра оҕолооҕун учуоттаан, оҥорбут буруйа кыра ыар буруй көрүҥэр киирсэринэн, суукка холуобунай дьыалатын сабарга, ыстараап эрэ төлөттөрөргө диэн хадатаайыстыба түһэрбиттэр .

Суут ону үөрэтэн, өрүттэр санааларын истэн баран, 15 тыһ. солк. ыстараап төлүүргэ уурбут. Ол эрэн, өскөтүн ыйыллыбыт болдьох иһигэр ити ыстараабын төлөөбөтөҕүнэ, ити уураах көтүрүллэн, холуобунай эппиэккэ тардыллыаҕын туһунан сэрэппит.

Манна даҕатан эттэххэ, былдьаммыт оонньуур аптамааттары бастаан анал контейнердарга уураллар, онтон суут уурааҕа тахсыбытын кэнниттэн Росимуществоҕа биэрэллэр. Росимущество сыаналаабытын кэнниттэн сыбаалкаҕа таһааран, бульдозерынан тэбистэрэн күртэрэллэр.

Следите за самым важным и интересным в Telegram-канале и WhatsApp-группе ЯСИА