Анаабыр улууһун Үрүҥ Хайа с. депутаттарын сэбиэтэ нэһилиэккэ арыгыны атыылааһыны бобор туһунан быһаарыытын улуус прокуратура уларыппыта.
Саха сиринээҕи Госалкогольконтроль управлениета Үрүҥ Хайа сэлиэнньэтин баһылыга Канат Алькеновтыын балаһыанньаны дьүүллэстэ. Онуоха Канат Ускенбаевич: «Биһиги сэлиэнньэбитигэр 1160 киһи олорор. Кыра сэлиэнньэ олохтоохторо арыгылааһыны утары уруккуттан охсуһаллар. Арыгылааһын туох да үчүгэйгэ тириэрдибэтинэн, күөх моҕой содулуттан өлүү ахсаана олус элбэх. Бэл, дьахталлар иһэллэр», — диэтэ.
Манна даҕатан эттэххэ, 2005-2006 сылларга үлэлээбит баһылык чөл олохтоох нэһилиэк буолары ситиспитэ. Бу кэмҥэ дьон-сэргэ үөһээ тыыммыт, олох таһыма тупсубут курдук буолбута. 2008 с. арыгылаах бородууксуйаны биирдиилээн атыылааһыны тохтото сылдьыбыттара да, прокуратура эмиэ бопсубута.
«Биһиги сэлиэнньэбитигэр кистэлэҥ туочукалары эппэккэ туран, биир эрэ маҕаһыыннаахпыт да, дьон аһыы утаҕы булан атыылаһар. Быйыл ыам ыйын бүтүүтэ бу боппуруоска нэһилиэнньэ түмсэн кэпсэтэ сылдьыбыта. Арыгыны атыылыыры бопсорго куоластаабыппыт, онно 500 быыбардааччыттан 300 киһи арыгыны атыылыыры бопсору туруорсубута. Депутаттар нэһилиэктээҕи сэбиэттэрэ быһаарыы ылыммытын сокуонунан бигэргэтээри СӨ Судаарыстыбаннай Мунньаҕар (Ил Түмэҥҥэ) докумуоннары туттарарга быһаарыммыппыт. Хомойуох иһин, Ил Түмэн бэс ыйынааҕы сессиятыгар хойутаабыт этибит, аныгыскы сессия күһүн эрэ буолар. Ол иһин, улуус прокуратурата арыгыны атыылааһыны бопсуубутун ылыммата. Ол да буоллар, биһиги докумуоннарбытын балаҕан ыйынааҕы сессияҕа син биир киллэриэхпит уонна арыгыны атыылааһыны сокуонунан бигэргэтэн бобуохпут», – диир баһылык.
Саха сиринээҕи Госалкогольконтроль управлениета Үрүҥ Хайа национальнай (долган) нэһилиэгин дьаһалтатыгар юридическай сүбэлэри-амалары биэриэҕэ. Ону сэргэ управление арыгыны атыылааһыны тохтоторго быһаарыммыт нэһилиэктэргэ барыларыгар босхо сүбэни-аманы биэрэрин уонна методическай көмөнү оҥорорун санатар.
