24 Тохсунньу 24.01
  • -48°
  • $ 73,82
  • 83,32

Оскуола-саад тутуутугар 14 улуус наадыйар

Бүгүҥҥү туругунан, оскуола-саад тутуутугар Абый, Алдан, Аллайыаха, Булуҥ, Үөһээ Бүлүү, Үөһээ Халыма, Дьааҥы, Эдьигээн, Муома, Аллараа Халыма, Орто Халыма, Уус-Майа, Усуйаана, Эбээн-Бытантай улуустара наадыйаллар. Маныаха, 27 кыра оскуоланы ылан көрдүлэр диэн Ил Түмэн пресс-сулууспата иһитиннэрдэ.

Ил Түмэн билимҥэ, үөрэххэ, култуураҕа, СМИ-гэ уонна уопсастыбаннай түмсүүлэр дьыалаларыгар ис кэмитиэтин бэрэссэдээтэлэ Федосия Габышева ыраах сытар нэһилиэктэргэ 2022-2026 сс. оскуола, уһуйаан тутуутугар 6 млрд 287 мөл. солкуобай наада.

Чуолаан, Абый улууһугар Сыаганнаах нэһилиэгэр 50 оҕолоох оскуола, Алдан улууһугар Угоян нэһилиэгэр 50/40 миэстэлээх оскуола-саад, Аллайыаха Оленегорск нэһилиэгэр 20/15 миэстэлээх оскуола-саад, Булуҥҥа Сииктээх нэһилиэгэр 70/25 миэстэлээх оскуола-саад, Найба нэһилиэгэр 80 миэстэлээх оскуола, Намы нэһилиэгэр 90/40 миэстэлээх оскуола-саад тутуутугар наадыйаллар.

Феодосия Габышева бэлиэтээбитинэн, сорох оскуолалар усулуобуйалара үөрэнээччи олоҕор кутталы үөскэтэллэр, ол да буоллар, атын дьиэ суоҕунан сибээстээн, онно билигин даҕаны оҕолору үөрэтэ олороллор.

Бу күннэргэ элбэх оробуочай хамыыһыйаларга үлэлээтибит. Сарсыҥҥыттан ыла Ил Түмэн иһинэн бүддьүөт-үп ырытыытын мунньахтара саҕаланыахтара. Бу кыһалҕанан биһиэхэ элбэх оскуола дириэктэрдэрэ көрдөһүүлээх тахсаллар. Ыраах сытар, аҕыйах ахсааннаах оҕолоох оскуолаҕа хапытаанай өрөмүөн ыытарга, саҥа үөрэх тэрилтэтин тутарга үбү олох көрбөттөр. Бу боппуруоһу Андрей Тарарсенконы уонна Сергей Местниковы кытары ырыппыппыт. Ол түмүгэр, үбүлээһини хантан көрдүүрбүтүн чопчулуохха диэн буолбута”, — диэн Феодосия Габышева бэлиэтээтэ.

СӨ Үөрэххэ уонна наукаҕа министирин солбуйааччы Владимир Тихонов биллэрбитинэн, билиҥҥи туругунан өрөспүүбүлүкэ үрдүнэн, 300-тэн тахса үөрэх тэрилтэтэ хапытаанай өрөмүөҥҥэ наадыйар. Салгыы хайа федеральнай бырагыраама иһинэн бу өрөмүөннэргэ үбүлээһини ылыахха сөбүн кэпсээтэ.

Социальнай соруктары хайдах быһаарар туһунан ырытыыга бэйэлэрин көрүүлэрин норуот депутаттара Любовь Явловская, Павел Ксенофонтов, Мария Христофорова иһитиннэрдилэр.

Любовь Явловская дэриэбинэҕэ оскуола хайаан даҕаны баар буолуохтаах диэн санаатын үллэһиннэ. “Хайа баҕарар сир оскуола эрэ баар буоллаҕына сайдар. Социологическай опрос түмүгүнэн өрөспүүбүлүкэ 19 улуустара депрессивнэй турукка сылдьаллар. Онон бу туһунан толкуйдаан, проблеманы сөптөөхтүк быһаарарга дьулуһуохтаахпыт”.

Мария Христофорова Үөрэх, Тутуу, Экономика министиэристэбэлэр кыттыгастаах мунньах тэрийэргэ этии киллэрдэ. Бу мунньахха тустаах министиэристибэлэр туох баар үөскээбит ыйытыыларга хоруйдуох тустаахтарын бэлиэтээтэ. Холобур аварийнай туруктаах оскуолар үлэлэрин, ыраах сытар нэһилиэктэргэ аҕыйах ахсааннаах оскуола-саады тутуу туһунан.

Ырытыы түмүгэр Феодосия Габышева туспа судаарыстыбыннай бырагыраамма оҥоһуллара саарбаҕын уонна эби үбү булар ыараханын биллэрдэ.

Ол да буоллар ыраах сытар нэһилиэктэргэ 2022-2026 сс. үөрэх тэрилтэлэрин тутуу бырагырамматын ылынарга туруорсуохпут”, -диэн парламентарий бэлиэтээтэ.

Этиилэри ипстэн баран, кэмитиэт чилиэттэрэ боппуруоһу Ил Түмэн бүддьүөтүн, үбүн, нолуогун уонна сыанаҕа бэлиитикэтин кэмитиэтигэр көтөҕүөххэ наада диэтилэр.

0
0
24 января 24.01
  • -48°
  • $ 73,82
  • 83,32