Николай КАРАМЗИН, үлэ ветерана. Павловскай:
‒ Былырыын, тохсунньу 30 күнүгэр, «Эркээйи» хаһыакка «Хорообут ньургуна ‒ Ньургун Скрябин» диэн ыстатыйам тахсыбыта. Бу күннэргэ Иван Ярыгин кэриэһигэр ыытыллыбыт турниры радионан уонна телевидениенэн долгуйа кэтээн көрдүм.
Ньургун финалга Дагестан бөҕөһүн Имам Аджиевы 4 баалга быраҕан, чахчыта да Саха сирин Ньургуна буолла эбээт! Быйылгы күрэхтэһиигэ 61 кг урут төрдүөннэригэр кыаттартаабыт кыһыытын таһааран, мөккүөрэ суох чаҕылхайдык, мындырдык тустан кыһыл көмүс мэтээли түөһүгэр иилинэр чиэстэннэ. Хапсыһыыларыгар бастакы тренерэ Гаврил Игнатьев үөрэппит албаһын сатабыллаахтык тутунна. Хорообутун хатыҥ чараҥа, Суолатын иҥэмтэлээх уута, күөх боллох олбохтоох Эбэлэрин балыга, хороҕор муостааҕын, сыспай сиэллээҕин битэмииннээх аһылыктара барыта холбоһон, Ийэ сирин Аан Алахчын Хотун бары бэлэхтэрэ тиийэн уоллара Ньургун этэ-сиинэ ситэн үрдүкү кыайыы ситиһилиннэ!
Ньургун кыайыытынан астынан туран төрөппүттэригэр, дьиэ кэргэнигэр, СР Спорка министригэр Михаил Гуляевка, тренеригэр махтанан, тус кыайыытын улууһун дьонугар-сэргэтигэр аныырын туһунан эппитин астына иһиттим.
Эдэркээн уолаттарбытыгар Ньургун Скрябиҥҥэ, Василий Егоровка, үүнэн эрэр эдэр спортсменнарга, тренердэргэ, күүс-көмө буолар дьонугар ситиһиилэри баҕарабыт, кыайыылара салҕана турдуннар диэн алгыспытын аныыбыт. Оройуоммут баһылыга Николай Старостины иннибитигэр уктаммыт бука бары чэбдик, чөл олох иһин хамсааһыннарга кыттыаҕыҥ, маассабай спорду сайыннарарга саалалары, сайыҥҥы площадкалары итиэннэ биирдиилээн да ыаллар бары дьарыктанар сирдээх, муннуктаах буолуоҕуҥ, хаамыынан, сүүрүүнэн дьарыктаныаҕыҥ.
Валерий КОЛОСОВ, «Хорообут нэһилиэгэ» МТ баһылыга:
‒ Биһиги нэһилиэкпит ыччата Ньургун Скрябин үрдүк ситиһиититтэн бүтүн республика дьонун-сэргэтин сүргэтэ көтөҕүлүннэ. Бу кыайыы сыралаах үлэ түмүгүнэн, элбэх көлөһүн тохтуутуттан кэллэ.
Ньургун Дмитрий Коркин турнирыгар ситиһиилээхтик кыттан кэлбитигэр көрсүһүү оҥорон, инникитин өссө үрдүк чыпчааллары дабайарыгар алгыспытын эппиппит үктэл курдук буолбутуттан астыныахпытын астынныбыт.
Ярыгин турнирыгар уолбут чахчы кыахтааҕын көрдөрдө, урукку өртүгэр хотторо сылдьыбыт бөҕөстөрүн үөс-батааскы биэрбэккэ, тиэрэ баттаталаата. Кини хайаан да чаҕылхайдык тустуоҕа диэн биһиги, олохтоохтор, эрэммиппит уонна ол эрэлбит номнуо туолбутуттан олуһун астынныбыт. Ньургун киһи быһыытынан киэн көҕүстээх, холку майгылаах, дьоҥҥо-сэргэҕэ, кырдьаҕаска да, эдэргэ да тэҥнээхтэрин курдук сыһыаннаһар. Кыайыы төрдө ‒ уолбут үчүгэй иитиллиилээҕэр буолар. Ийэтэ Юбилина Юрьевна, аҕата Владимир Васильевич түөрт уолларын иитиитигэр кыһамньылаахтык сыһыаннаһаллар, оҕолор үлэҕэ, үөрэххэ бары да кыайыгастар-хотугастар, нэһилиэк олоҕор, спорка, күрэхтэһиилэргэ көхтөөхтүк кытталлар. Убайдара кинилэргэ уонна нэһилиэк уолаттарыгар үтүө холобур буолуоҕа.
Мария ОСИПОВА, Ньургун маҥнайгы учуутала. Хорообут:
‒ Ньургун Хорообут орто оскуолатыгар 1997 с. маҥнайгы кылааска үөрэнэ киирбитэ. Начальнай кылааска 28 буолан үөрэммиттэрэ. Ньургун ыал улахан оҕото буолан боччумнаах, бэрээдэктээх оҕо этэ.
Кылааска спорт сектора буолан уолаттары кыайа-хото тутара, кини тылыттан ким да тахсыбат буолара. Элбэх саҥата суох, эрдэттэн барытын аттаран толкуйдуур буолан эппиэтинэстээх, үөрэҕэр үчүгэй этэ. Бастакы тренерэ Гаврил Игнатьевы кытта атын оскуолаҕа үөрэнэ барбыта. Ньургун тустуутун кэтээн көрөбүт, көрүстэҕинэ үөрэ-көтө кэпсэтэбит. Үөрэппит-такайбыт спортсмен уолбут үрдүк ситиһиитинэн учууталлара, биир дойдулаахтара киэн туттуохпутун туттабыт.
