Ньурба улууһугар кэтэх дьиэ туттааччылары өйүүр, кинилэргэ көмөлөһөр сыаллаах «СӨ 2012-2019 сылларга хаачыстыбалаах дьиэнэн хааччыйыы» ИЖС бырагырааматынан 15 мөл. солк. харчы көрүллүбүт.
Ньурба улууһугар бырагыраамаҕа сөп түбэһиннэрэн, 6 ый түмүгүнэн 2568 кв.м. дьиэ тутуллан, 28 ыал саҥа дьиэлэннэ. Кинилэртэн 14 киһи дьиэ туттарыгар харчытын ылан туһаммыт.
Ньурбатааҕы инвестиционнай тутуу управлениета иһитиннэрэринэн, улууска 1 кв.м. сыаната 25 900 солк. бигэргэммит. Дьиэ туттааччы хааччыллыыта суох дьиэни 256600-839790 солк, онтон толору хааччыллыылааҕы 325030-1026400 солк. иэс ылан туттуон соп. «Маныаха дьиэ-кэргэн ахсаана улахан оруолу ылар. Быйыл ордук хото бу бырагырааманан нэһилиэк олохтоохторо туһаннылар. Кинилэртэн түөрт ыал толору хааччыллыылаах дьиэни тутунна», — диэн улуус баһылыга Борис Попов эттэ.
Улуус үрдүнэн 2016 сылга барыта 10 500 кв.м. дьиэ тутуллан үлэҕэ киирэрэ былааннанар. Онон Ньурбаҕа эбии 130 ыал тупсаҕай көстүүлээх саҥа дьиэлэниэ.
