Бүгүн, муус устар 29 күнүгэр, оскуола оҕолоругар анаан тэриллибит өрөспүүүлүкэтээҕи Наука аччыгый академията биир төгүрүк сааһын туолла.
Ил Дархан Егор Борисов ыйааҕынан наукаҕа бэйэлэрин сэмэй хардыыларын оҥорон эрэр обургу оҕолору өйүүр сыаллаах Хаҥаластааҕы “Ленскэй кыраай” физико-математическай форум иһинэн өрөспүүбүлүкэтээҕи Наука аччыгый академията тэриллибитэ. Бу бэлиэ күн чэрчитинэн бэҕэһээ, муус устар 28 күнүгэр, араас таһымнаах конференциялар уонна олимпиадалар кыайыылаахтарын түмэр өрөспүүбүлүкэтээҕи “Кэскиллээх интеллектуальнай лидердар» диэн үс күннээх форум саҕаланна. Манна араас улуустартан 120 оҕо кэлэн кыттыыны ыла сылдьар. Бу тэрээһин түмүк күнүгэр Ил Дархан Егор Борисов уһулуччу ситиһиилээх 100 оҕоҕо өрөспүүбүлүкэтээҕи Наука аччыгый академиятын дьиҥнээх чилиэн-кэрэспэдьиэнэ уонна чилиэн-кэрэспэдьиэн түөскэ кэтэр бэлиэлэрин уонна анал стипендиялары туттарыаҕа. Наукаҕа уһулуччу ситиһиилээх 10 улуус оскуотыгар научнай үлэни тэрийэр экспедициялары үлэлэтэллэригэр анаан граннары туттарыаҕа.
Форум аһыллыытыгар анаан сылдьан, араас улуус оҕолорун кытта кэпсэттим. Дьааҥыттан Валерия Неустроева олоҥхо тылын-өһүн ырытан, Анаабыртан Настя Семенова Улуу Кыайыы 70 сылыгар аналлаах 70 ахсаан сорудаҕын толкуйдаан, Таатта лицейиттэн Толя Барбасытов икки кылаас оҕолоро холбоһон, оҕо саадыгар араас аһымал аахсыйа ыытан, научнай-практическай кэмпириэнсийэлэргэ кыттыбыттар. Интеллктуальнай лидердар үксүлэрэ Санкт-Петербурга “Бэйэҕэр учуонайы арый” диэн суолталаах научнай тэрээһиҥҥэ кыттыбыттар. Стипендиаттар бары өрөспүүбүлүкэтээҕи уонна Бүтүн сойустааҕы научнай кэмпириэнсийэлэр лауреаттара.
