Баал чэрчитинэн икки акция ыытылынна. Ол курдук, Нам улууһугар алдьархайга түбэспит — дьиэлэрэ умайан, турар бэйэлэрэ хаалбыт дьиэ кэргэҥҥэ күүс-көмө буолан мал-сал хомуйдулар. Ону таһынан ГАИ инспектора Ольга Павлова салайааччылаах оскуола оҕолоро хараҥаҕа сырдыыр лиэнтэлэри хас биирдии кыттааччыга, ыалдьыкка түҥэттилэр.
Үгэс быһыытынан сыл түмүктэрин таһаарыы буолла. 2015 сыл түмүгүнэн, ыччат буолалларын быһыытынан, аныгылыы эриэккэс номинациялар туттарылыннылар: «VIP семья 2015 года» — «Эдэр ыал» республикатааҕы күрэс кыайыылаахтара Алла, Петр Максимовтар, «За кипучую деятельность» — А.Ф. Шестаков аатынан СК хореограба Римма Бурнашева, «Масштабная личность, авторитетный лидер» — Нам улууһун эдэр учууталларын ассоциацияларын председателэ Николай Жирков, «Надежда села» — бааһынай хаһаайыстыба баһылыга Наталья Соловьева, «За преданность делу» — Модут нэһилиэгин ыччатын специалиһа Николай Ядрихинскай, «Бизнес-леди» — ИП Светлана Макарова. Бары номинаннар кубогынан уонна анал бирииһинэн наҕараадаланнылар. Ону тэҥэ Ил Түмэн комитетыттан, ыччат уонна дьиэ кэргэн политикатын управлениетыттан, улуус баһылыгыттан махтал суруктар туттарылыннылар.
Балаһыанньа быһыытынан, 2016 сыл дойдуга Киинэ сыла биллэриллибитинэн, хас биирдии нэһилиэк араас киинэлэр, мультиктар ис хоһооннорунан аныгылыы ханыылатан туруоруу бэлэмнээбиттэр. Холобура: «5 Миньоннаах Грю урааҥхай», «Планета обезьян», «Стиляги», «Малифисента», «Маша и Медведь», «Пираты Карибского моря» о.д.а. Бары бэркэ диэн бэлэмнэммиттэрэ, ох курдук оҥостубуттара көстөр. Хатырык, Хатыҥ Арыы нэһилиэктэрэ уонна «Волонтеры и Юность Якутии» общественнай түмсүү кыттыылаахтарын туруорууларын бэлиэтээн этиэххэ наада. Олус интэриэһинэй, бэһиэлэй көрдөрүүнү туруордулар. Дьүүллүүр сүбэ түмүгү таһаарбытынан, «Малифисента» киинэнэн туруорбут Үөдэй нэһилиэгин ыччатын туруоруута бастаан, «2015 сыл Нам улууһун бастыҥ хамаандата» номинацияны ылан, 10 тыһ. солк. суумалаах сертификатынан наҕараадаланна. Үөдэйдэр олуһун кыһаллан-мүһэллэн оҥостубуттара, ымпыктаан-чымпыктаан толкуйдаабыттара өтө көстөр.
Быйылгы баал, кырдьык, үрдүк таһымнаахтык ааста. Ыччат уонна дьиэ кэргэн политикатын управлениетын специалиһа Юлия Жергина таһаарыылаах үлэтин сыллааҕы түмүгэ буолар диэтэхпитинэ, сыыспаппыт буолуо. Кини сүүрэн-көтөн, улууспут ыччатын түмэн, сомоҕолоон араас үрдэллэри дабайабыт, иннибит диэки эрэллээхтик хардыылыыбыт. Онон сибээстээн, Юлябытыгар улуус ыччатын аатыттан барҕа махталбытын тиэрдэбит. Үгүс түбүктээх үлэҥ үтүө түмүктэрдээх буоллун! Бары бииргэ — биир сомоҕо буолуохха!
