Нам улууһун 1 Хомустааҕар, саҥа аһыллыбыт спортивнай саалаҕа, СР спордун ветерана, ветераннар икки ардыларыгар «СахаВА» бочуоттаах маастара Анатолий Михайлович Софронов бирииһигэр, үбүлүөйдээх 60 сааһын көрсө улуустааҕы волейбол күрэхтэһиитигэр аһаҕас турнир буолан ааста.
Күрэхтэһиигэ тирии мээчиги өрө тутар Үөдэй, 1 Хомустаах, Партизан, Хамаҕатта, Никольскай, Хатыҥ Арыы, 2 Хомустаах, Хатырык нэһилиэктэрин уонна Намнааҕы педколледж устудьуоннарын, спортивнай оскуола иитиллээччилэрин хамаандалара икки күн кииристилэр.
Анатолий Софронов бирииһигэр ыытыллар күрэхтэһиини үөрүүлээхтик аһыыга «Нам улууһа» МТ баһылыга Александр Атласов, бастакы кылаастаах муниципальнай советник, баһылык солбуйааччыта Николай Степанов, «1 Хомустаах нэһилиэгэ» МТ баһылыга Василий Жирков, Намнааҕы физическэй культура уонна спорт управлениетын үлэһиттэрэ, «СахаВА» общественнай тэриллии председателэ Сергей Иванов, «Мин Сахам Сирэ XXI үйэҕэ» диэн республикатааҕы үтүө дьыала хамсааһын салайааччыта Иван Емельянов, «СахаВА» общественнай тэриллии директорын эбээһинэһин толорооччу Владимир Ли-Фу уо.д.а. кыттыыны ыллылар, Анатолий Михайловичка бэйэлэрин махтал суруктарын уонна сэмэй бэлэхтэрин туттартаатылар.
Икки күннээх тыҥааһыннаах киирсии кэнниттэн Хамаҕатта хамаандата 3 очколанан 1-кы миэстэни ылан Анатолий Софронов аатыттан кубок туттулар. 2-с миэстэҕэ 4 очколаах Хатыҥ Арыы, 3-с миэстэҕэ 6 очколаах Намнааҕы педколледж хамаандалара таҕыстылар. Хамаанда оонньооччуларыгар эр дьоҥҥо, кыргыттарга анал номинациялар олохтоннулар.
нэһилиэккэ саҥа спортивнай саала тутуллубутун кэннэ бу бастакы күрэхтэһии, онон олус долгутуулаах буолла. Маннык күрэхтэһиилэр инники өттүгэр тохтоло суох ыытыллалларыгар олук уурулунна.
