Сэтинньи 12 күнүгэр судаарыстыбаннай сүбэһит Михаил Николаев Музыка үрдүкү оскуолатыгар Соҕуруу Кореяттан кэлэн оҕолору үөрэтэ сылдьар преподаватель Но Тэ Чолу кытары көрсөн саха-корейскай музыкальнай оскуола туһунан кэпсэттэ.
Сеул кэнсиэртиир оркестрын сүрүн дирижера Но Тэ Чол Музыка үрдүкү оскуолатыгар балаҕан ыйыттан кэлэн үлэлии сылдьар. «Саха сирин туһунан эрдэ өссө Бурятияҕа үлэлии сылдьан истибитим. Киин сиртэн олус ыраах уонна аҕыйах нэһилиэнньэлээх региоҥҥа толору симфоническай оркестр баарын истэн, билэн соһуйбутум. Ити аата бу дойдуга музыкаҕа ураты болҕомтону уураллар эбит дии санаабытым», — диэн кэпсиир Но Тэ Чол.
Манна даҕатан эттэххэ, кини өссө бу саас ыам ыйыгар Дьокуускай куоракка Саха сирин уонна Корея симфоническай оркестрдарын холбоһуктаах кэнсиэригэр кыттан турар. Онно кини Саха сирин искусствотын үтүөлээх үлэһитэ Наталья Базалеваны кытары тэҥҥэ дирижердаабыта.
Но Тэ Чол оҕолору дьарыктыырын таһынан өрөбүл күннэргэ музыканы таптааччыларга кулууп тэрийиэн, ону таһынан Саха сиригэр Кореяттан дьоһун делегацияны аҕалан төрөөбүт норуотун үгэһин, тылын-өһүн билиһиннэриэн, Корея олохтоохторугар Саха сирин туһунан кэпсиэн-ипсиэн баҕарар. «Саха сирин Кореяҕа билбэттэр. Онон музыканы, туризмы бииргэ тутан Корея олохтоохторугар билиһиннэриэххэ сөп», — диэн бэлиэтиир Но Тэ Чол.
Михаил Николаев «Музыка – барыбытыгар» диэн бырайыагын, Саха сиригэр Саха-корейскай оскуола аһыллан үлэлии турарын, Корея Саха сирин кытары уруккуттан үлэлэһэрин кэпсээн туран, музыкальнай хайысхалаах саха-корейскай оскуоланы тэрийии тиэмэтин арыйда. Но Тэ Чол бу этиини ылынан, хас биирдии өрүтүн үөрэтэн көрүөх буолла.
