28 Кулун тутар 28.03
  • -13°
  • $ 92,59
  • 100,27

Мэҥэ Хаҥаласка "Эркээйи" хаһыат үбүлүөйдээх эстафетата

18:26, 01 мая 2016
Текст:
Читайте нас на
Яндекс Новости
ЯДВ

Мэҥэ Хаҥалас улууһугар «Эркээйи» оройуон хаһыатын бирииһигэр сүүрүүгэ эстафета сыллата ыытыллар. Быйылгы тэрээһин улууска биллэриллибит Спорт уонна физическэй культура сылыгар уонна эстафета төрүттэммитэ 60 сыллаах үбүлүөйүгэр ананна. 


Ыам ыйын 1 күнүгэр улуус оскуолаларын уонна нэһилиэктэрин икки ардыларыгар түөрт бөлөҕүнэн арахсан күрэхтэстилэр. Оройуон хаһыатын бирииһигэр үбүлүөйдээх эстафета Үлэ, Эйэ, Саас бырааһынньыгар чөл олоҕу, спорду, сүүрүүнү улуус нэһилиэнньэтин киэҥ араҥатыгар тарҕатар сыаллаах тэрээһиннээхтик ыытылынна.

Бастакы дистанцияҕа бастаабыт спортсменнарга спорт ветераннара, сүүрүктэр Алексей Березкин, Прокопий Старостин, Афанасий Илларионов уонна чөл олох, спорт тиэмэлэрин сырдатыыга, эстафетаны тэрийсибит, оройуон хаһыатын кылаабынай редакторын солбуйааччытынан үлэлээбит Василий Сидоров ааттарынан анал бириистэр туттарылыннылар. Сыаналаах бириистэри ветераннар чугас дьонноро олохтоотулар.

Кыайыылаах уонна бириистээх миэстэлэри ылбыт хамаандаларга улуус дьаһалтата, үөрэх управлениета, хаһыат редакцията уонна улуустааҕы чэпчэки атлетикаҕа федерация 20000 солкуобайдаах сертификаттары туттартаатылар.

Оттон биирдиилээн бастаабыттар 10000, иккис миэстэлээхтэр 6000, үһүскэ тиксибиттэр 4000 солк. суумалаах сертификаттары туттулар.

Оскуолалар ортолоругар 9 хамаанда кыттыбытыттан, Хара орто оскуолатын хамаандата эрэллээхтик бастаата. Майатааҕы лицей иккис, академик Владимир Ларионов аатынан Майа орто оскуолата үһүс бириистээх миэстэлэргэ тигистилэр. Хамаандалар өйдөбүнньүк кубогынан, дипломунан, кыттааччылар грамоталарынан, мэтээлинэн наҕараадаланнылар. СР Ил Дарханын уонна Правительствотын дьаһалтатын салайааччыта, биир дойдулаахпыт, «Биир ньыгыл Россия» партия барыллаан куоластааһынын кыттыылааҕа Юрий Куприянов олохтообут «Кыайыыга дьулуурун иһин» анал бирииһэ Филипп Охлопков аатынан Майа орто оскуолатын үөрэнээччилэрин хамаандатыгар туттарылынна.

Улахан нэһилиэктэргэ Дьаҥхаады нэһилиэгин сүүрүктэрэ быйыл да иннилэрин кимиэхэ да биэрбэтилэр. Иккискэ Майа, үһүскэ Бүтэйдээх хамаандалара таҕыстылар. Орто нэһилиэктэргэ Ходоро бастакы, Алтан иккис, Доллу үһүс миэстэлэннилэр. Кыра нэһилиэктэргэ догдоҥолор кыайыылаах таҕыстылар.

Эстафета кыттыылаахтарын улуус баһылыга Николай Старостин, «Эркээйи» хаһыат редактора Алена Докторова, улуус дьаһалтатын спорка уонна физкультураҕа управлениятын начальнига Александр Брызгалов эҕэрдэлээтилэр.

Следите за самым важным и интересным в Telegram-канале и WhatsApp-группе ЯСИА