Майаттан «Muusuus» хамаанда Красноярскайга ыытыллыбыт куонкуруска бастаата
- Муус оҥоһуктарга кыайыылаахтарынан «Кестик» диэн Кызылтан сылдьар хамаанда «Кустук» композициятынан, оттон хаар оҥоһуктарга Саха сириттэн биир дойдулаахтарбыт Майатааҕы М.К.Попова аатынан музыкальнай оскуола уруһуйга преподавателэ Петр Петухов уонна «Майа Агроснаб» үлэһитэ Архип Скрябин «Muusuus» диэн хамаандалара «Дьол» диэн бэртээхэй композицияларынан буолан, дьон-аймах кэрэхсэбилин ыллылар. Дьүүллүүр сүбэ биһирэбилин ылбыт бастыҥ үлэҕэ мэник-тэник оҕолор үөрэ-көтө сыыртан сырылыы оонньуу сылдьаллара ойууланар.
- Биэс миэтэрэ үрдүктээх, алта миэтэрэ кэтиттээх композиция атын үлэлэртэн кээмэйинэн куоһарар улахан эбит.
- Петр Петухов конкурска хайдах кыттыбыттарын туһунан кэпсээтэ:
- ‒ Красноярскай куоракка тохсунньу 13 күнүгэр тиийбиппит, үлэбитин тохсунньу 14-тэн саҕалаан 17 чыыһылаҕа диэри түөрт күн устата оҥордубут. 18 чыыһылаҕа дьүүллүүр сүбэ көрдө уонна түмүгү ол күн таһаарбыта. Биһиги үһүс сылбытын кыттабыт, онон уоппутураммыт, хайдах эскиз кыайыан сөбүй диэн элбэх эскиһы уруһуйдаабытым да, пластилинынан да оҥорбутум. Кылаабынайа, ис хоһооно, эскиһэ үчүгэй буолуохтаах. Оҕолор сыырга оонньууллара дьоҥҥо барытыгар чугас тиэмэ. Бу сиргэ киһини үөрдэр, дьоллуур ‒ оҕо уонна оҕо саас, ол иһин тиэмэбитин «Дьол» диэн ааттаабытым. Таҥастара-саптара хаатыҥка, саллааттар курдара. Ити мээнэҕэ буолбатах, ити аата сэриини туораан, эйэлээх олоххо үктэммит оҕолор, бу композиция эбээлэрбитигэр, эһээлэрбитигэр ананар үлэ буолар.
- Дойдубутун, улууспутун, Сахабыт сирин ааттаппыт уран трабахтаах, талба талааннаах эдэр дьоҥҥо үрдүктэн үрдүк ситиһиилэри баҕарабыт.
