Өлөөн улууһун киинигэр «Илкит» культура, спорт киинигэр тэрилтэлэр спартакиадалара саҕаланна.
Оройуон үлэһиттэрэ тэрилтэлэринэн хомуллан, спартакиада арыллыытыгар мустан параадка кытыннылар. Хамаандалары баһылык Александр Иванов эҕэрдэлээтэ. «Бу спартакиада түмүгүнэн саамай күүстээхтэр, быһыйдар, сымсылар кэлэр сайын Үөһээ Бүлүүгэ ыытыллыахтаах Манчаары оонньууларыгар кыттар чиэскэ тиксиэхтэрэ», — диэн тоһоҕолоон эттэ.
Сспортсменнары спорт ветерана, энтузиаст Семенов Николай Семенович эҕэрдэлээтэ. Спартакиада былааҕын оҕунан ытыыга маастарга кандидат Марианна Винокурова уонна Станислав Степанов көтөхтүлэр. Оройуоҥҥа саҥа сайдан эрэр оҕунан ытыы көрүҥэр эрчиллэ сылдьар Өлөөн олохтооҕо Михаил Софронов, бу көрүҥҥэ спорт маастарга кандидата Марианна Винокурова ох саанан ытар ньымаларын көрдөрдүлэр.
Хамаандалар икки ардыларыгар волейбол оонньуута саҕаланна. Атын көрүҥнэр график быһыытынан ыытыллыахтара.
