«Азия оҕолоро» норуоттар икки ардыларынааҕы спортивнай Оонньууга Өлөөн улууһуттан оҕолор кытыннылар. «Орончикан» оҕо-үҥкүү народнай ансамбыла культурнай мероприятиены киэргэтистэ.
Тимур Петров «Орончикан» ансамбль кыттыылааҕа буолан, 2008 сыллаах Оонньуу өрөгөйдөөх чааһыгар кыттыбыта. Онтон ыла номнуо 8 сыл ааста. Билигин Тимур Өлөөн оскуолатын ситиһиилээхтик бүтэрэн, Дьокуускайдааҕы авиационнай-техническэй училище иккис кууруһун устудьуона.
— 2008 сыллаахха «Орончикан» ансамбль «Азия оҕолоро» спортивнай Оонньуу аһыллыытыгар культурнай чааһыгар кытта барбыппыт. Доҕорбун Афанасьев Максимы кытта хоспутугар оонньуу олордохпутуна биир киһи кэлбитэ уонна салайааччыбытын ыйыппыта. Салайааччыбытын Наталья Валерьевнаны ханна эрэ ыҥыран илдьэ барбыта. Сотору соҕус буолаат кини үөрэн аҕай кэлбитэ. Тимур, эйигин кылаабынай оруолга ылаллар үһү, улахан эппиэтинэскэ тигистиҥ диэбитэ. Ийэбэр эппиттэрэ, кини сөбүлэспитэ. Билигин санаатахпына үөрэбин. Араас омук оҕолорун түмэр спорт бырааһынньыгар кыттыбытым олохпор умнуллубат дьоллоох түгэним буолар, — диэн кэпсиир Тимур.
«Азия оҕолоро» 2008 сыллааҕы норуоттар икки ардыларынааҕы Оонньуу аһыллыытын кыттыылааҕа Тимур Петровка норуоттары сомоҕолуур оҕо спордун бырааһынньыга улахан эппиэтинэһи сүктэрбитэ, үйэ-саас тухары умнуллубат дьоллоох түгэни бэлэхтээбитэ. Тимур ол Оонньуулар саҕана кырачаан уолчаан этэ, «Азия оҕолоро» спортивнай Оонньуу сабыллыытын Уотун иһитин тутан тэлиэгэҕэ олорсон иһэрэ бу баарга дылы.
Тимур билигин үөрэҕин быыһыгар спордунан дьарыктанар, «Заря» футбол хамаандатыгар баар. Инникитин сөмөлүөккэ борт-механик буоларга сыал туруорунан сылдьар.
