24 От ыйа 24.07
  • 16°
  • $ 87,3
  • 95,46

Өлөөн олохтоохторо правительство үлэтин биһирииллэрин биллэрдилэр

12:21, 04 февраля 2016
Текст:
Читайте нас на
Яндекс Новости
ЯДВ

Саха Өрөспүүбүлүкэтин Правительствотын 2015 сыллааҕы үлэтин сүрүн түмүктэрин уонна үүммүт 2016 сылга толоруллуохтаах сүрүн үлэ хайысхаларын туһунан иһитиннэриини Саха Өрөспүүбүлүкэтин доруобуйа харыстабылыгар министрэ Александр Горохов оҥордо.

Дакылаатчыт СӨ Правительствотын өрөспүүбүлүкэ оҥоруулаах күүстэрин сайыннарыыга, нэһилиэнньэ үлэлээх-дохуоттаах буолуутун ситиһиигэ, социальнай эйгэ тэрилтэлэрэ толору үбүлээһин суотугар ситиһиилээхтик үлэлээһиннэрин хааччыйыы, нэһилиэнньэ дохуотун үрдэтиини ситиһиигэ уонна гражданскай уопсастыбаны сайыннарыы боппуруостарыгар ыытыллыбыт үлэлэри балтараа чаастаах дакылаатыгар сиһилии мустубут нэһилиэнньэҕэ билиһиннэрдэ.

Толоруулаах былаас нэһилиэнньэ иннигэр 2015 сылга отчуотун кэмигэр 57 толорууга ылыллыбыт этииттэн сыл устата 32 этии толоруллубут, 20 — толорууга сылдьар уонна 5 этии толоруллубатах.

Нэһилиэнньэттэн киирбит этиилэриттэн кыайан толоруллубатахтар – нэһилиэктэргэ Сбербаан филиалларын арыйыы, дьиэ туттааччыларга тутуу матырыйаалларын тиэйии ороскуотун төлөөһүн, Өлөөн сэлиэнньэтинээҕи «Молодежнай» микро-оройуон квартальнай котельнайын тутуу; муниципальнай хочуолунайдары ГУП ОДьКХ балансатыгар биэриини саҕалааһын уонна «АЛРОСА» ААУо, «Анаабыр алмаастара» хампаанньаны кытта дуогабардары түһэрсиини тэрийии.

СӨ Правительствотын 2015 сыллааҕы үлэтин отчуотун дьүүллэһиигэ Өлөөн сэлиэнньэтин олохтоохторуттан үлэ бары салааларын хабан туран 29 боппуруос киирдэ уонна бары бэриллибит боппуруостарга отчуоту туруора кэлбит оробуочай бөлөх чилиэннэрэ эппиэттэри, быһаарыылары биэрдилэр.

Үгүс боппуруос оройуон экономикатын сайдар хайысхаларыгар, нэһилиэнньэ үлэлээх, дьарыктаах буолуутугар, сир сыһыаннаһыытыгар уонна промышленнай тэрилтэлэри кытта сыһыаннаһыыга сыһыаннаан киирбитинэн сыаналаатахха, миэстэтигэр хааччыйар тэрилтэлэр үлэлэрэ саҥа таһымҥа тахсыбыт.

Саха Өрөспүүбүлүкэтин Правительствотын отчуотун дьүүллэһиигэ бэйэлэрин санааларын, этиилэрин киллэрэн тыл эттилэр: Еремеев Э.А. – Саха Өрөспүүбүлүкэтин бочуоттаах тутааччыта, пенсионер, Константинова Г.А. – Өлөөн орто оскуолатын үлэһитэ, Петрова А.Т. – оройуон Сэбиэтин «Суглан» депутата, «Кэнчээри» уһуйаан сэбиэдиссэйэ, Христофоров В.А. – Саха Өрөспүүбүлүкэтин үтүөлээх ветеринарнай бырааһа, Николаев Н.С. – Өлөөн эбэҥки национальнай оройуонун бочуоттаах олохтооҕо, советскай уонна хаһаайыстыбаннай тутул бэтэрээнэ, Иванова О.Л. – «Дьэлиҥдэ» муниципальнай таба иитэр хаһаайыстыба дириэктэрэ, Николаев С.Н. – Өлөөн национальнай нэһилиэгин дьаһалтатын үлэһитэ.

СӨ Правительствотын отчуотун дьүүллэһиигэ кыттыбыт нэһилиэк олохтоохторо бука бары Правительство ыытар үлэтин биһирииллэрин биллэрдилэр уонна бэйэлэрин этиилэригэр Правительство болҕомтотун хотугу үгэс буолбут салааларга – таба, сылгы иитиитигэр, табаһыттар хамнастарын ыйга 40,0 тыһ. солк. диэри тиэрдии боппуруоһугар, оройуон киинин Өлөөн сэлиэнньэтин толору хааччыллыыллах оҥорууга үбүлээһиҥҥэ, 100 миэстэлээх оҕо саадын уонна этнокультурнай киин үбүлээһинин түргэтэтиигэ, оройуон киин балыыһатын саҥа медицинскэй оборудованиенан уонна сөптөөх медицинскэй кадрдарынан хааччыйыыга, оройуон сирин-уотун олохтоох нэһилиэнньэҕэ, хаһаайыстыбаларга хаалларарга кадастровай учуоту ыытыыга кииннээн үбүлээһини көрүүгэ, промышленнай тэрилтэлэри кытта оройуон дьаһалтата анал дуогабардары түһэрсэригэр практическай көмөнү оҥорууга туһаайдылар уонна сылын ахсын Правительство нэһилиэнньэ иннигэр туруорар отчуоттара улахан туһалаахтарын, салгыы салҕанан бараллара наадатын бэлиэтээтилэр.

Следите за самым важным и интересным в Telegram-канале и WhatsApp-группе ЯСИА