Балаҕан ыйын 17 күнүгэр Павловскай оскуолатын учууталлара Анна Егорова, Светлана Пудова, Александра Дмитриева»Сахабэчээт» үлэһиттэрин кытта атах тэпсэн олорон, »Өксөкүлээхтиин сэһэргэһии» диэн көрсүһүүнү, үөрэтиини ыыттылар.
Бу иннинэ кинилэр «Кэскил» оҕо кыһатын кытта «Бэлэм буол!» сурунаал чэрчитинэн, анал үлэлиир тэтэрээттэри бэчээттээн таһаарбыттара. Бу тэтэрээттэр өҥнөөх ойуулаахтар, элбэх сорудахтаахтар. Өксөкүлээх айымньыларын дорҕоонноохтук ааҕа-ааҕа, ыйытыыларга хоруйдуур, аныгы олоххо сыһыаран, хардалары буларга көмөлөһөллөр.
Лаборатория А.Е. Кулаковскай айымньыларын ойуулуур-дьүһүннүүр ускуустуба араас көрүҥнэринэн киэҥ эйгэҕэ таһаарар сыаллаах «Хоһоон хонуута» бырайыагынан оҕолорго уруһуй күрэһин ыыппыта. Бырайыак ааптара — Анна Михайловна Егорова. Күрэскэ киирбит уруһуйдарынан бу оробуочай тэтэрээттэри киэргэппиттэр, айымньылар ис хоһооннорун арыйбыттар.
»Өксөкүлээхтиин сэһэргэһии» оробуочай тэтэрээттэринэн үлэ 9 тиэмэнэн барар. Бу маннык хабааннаах көрсүһүүлэр, уруоктар оҕолорго, учууталларга, иитээччилэргэ туһалаах буолуохтара.
