«Кэскил» оҕо издательствота үүнэр көлүөнэҕэ аналлаах сайты арыйан эрэр. Сайт үөрүүлээх аһыллыыта балаҕан ыйын 1 күнүгэр буолуоҕа.
Билигин бу сайты эдэр кэскиллээх программистар уонна дизайнердар оҥоро сылдьаллар. Ол курдук, манна саҥардылла турар сонуннар, оҕолорго аналлаах дьаһаллар афишата, «Кэскил»-«Юность Севера» хаһыаттар, «Чуораанчык»-«Колокольчик» сурунааллар онлайн архыыптара, «Академия талантов» анал бырайыактара баар буолуохтара.
Бу сылга ыытыллар эбии үөрэхтээһин, киинэ, тэлгэһэни тупсарыы сылыгар аналлаах куонкурустар: холобура, олох-дьаһах коммунальнай хаһаайыстыба тэрилтэтин кытта «Мин дьиэм тэлгэһэтэ баҕа санаабар» (Двор моей мечты), «Якутскэнерго»-ны кытта «Бииргэ, чаҕылхайдык» диэн уруһуйдар күрэхтэрэ ыытыллыахтара. Ону тэҥэ, өссө медиатека үлэлиэҕэ. Оҕолор видео угуохтара, форумҥа кыттыахтара, өссө бэйэлэрин блогтарын ыытыахтара.
Сүрүн болҕомто үөрэхтээһин, иитии хайысхатыгар уурулларын тэрийээччилэр иһитиннэрэллэр. Сыал-сорук сайт нөҥүө ханнык баҕарар хайысхаҕа талааннаах оҕону көрдүүргэ-буларга турар. Манна тирэнэн, ыччат каадырга саппааһыгар оҕолору бэлэмниэхтэрэ. Итинэн сибээстээн, «Ленский край» форуму, Музыка Үрдүк Оскуолатын, Олимпийскай саппаас училищетын кытта ыкса үлэлиир былаанаахтар.
«Моя Якутия» үөрэхтээһин бырайыага үлэлиэ. Бу бырайыак патриотическай хайысхалаах. Оҕолор төрүт түөлбэлэрин уратытын, туох кэрэхсэбиллээҕин туһунан суруйуохтаахтар. Ону таһынан төлөпүөҥҥэ мобильнай сыһыарыылары киллэриини торумнуохтара. Холобура, «Чуораанчык»-«Колокольчик» сурунаал 3D ньыманан тахсан, субу көстөн олорор курдук, хартыынкалара тиллэн кэлиэхтээхтэр. Бастакы холонуу — сахалыы тылынан «Остуоруйалар» төрөппүттэргэ аналлаах сыһыарыы Стас Ноев — «Ситим» тэрилтэ көмөтүнэн таҕыста.
