18 От ыйа 18.07
  • 18°
  • $ 88,09
  • 96,3

Казахстан бэрэстэбиитэлэ: Дьокуускай ыраас, чөкө куорат

13:09, 13 июля 2016
Читайте нас на
Яндекс Новости
ЯДВ

«Азия оҕолоро» VI Оонньууларга омук дойдуттан кэлбит саамай элбэх спортсменнаах Казахстан хамаандатын бэрэстэбиитэлэ, олимпийскэй бэлэмнэнии киинин дириэктэрэ Руслан Жулдыбаев Саха сирин, Оонньуулар тустарынан санаатын үллэһиннэ.


«Саха сирин айылҕаты – ураты кэрэ, ону Өлүөнэ очуостарыгар сылдьан илэ көрөн итэҕэйдибит. Дьокуускай – ыраас, чөкө куорат, дьоно-сэргэтэ олус үтүөлэр. Холобур, соторутааҕыта бырдахтан сапсына турдахпытына, массыынан ааһан иһэр киһи кумаары утары ыстарар спрейи биэрбитэ. Саха сирэ уонна Казахстан майгыннаһаллар диир уустук, тоҕо диэтэххэ биһиги истиэпкэ олоробут. Манна – ойуур, тайҕа. Култуурабытынан, өйбүтүнэн-санаабытынан ханыылыы омуктарбыт. Эһиги убаһаны сиигит, биһиги – ат этин. Саҥарар тылбытыгар майгыннаһар тыллар бааллар. Саха сиригэр күн-дьыл туруга биирдэ куйаас, биирдэ тымныы буола түһэринэн уратылаах. Уопсайынан, Саха сирин туһунан үтүө эрэ өйдөбүл сүрэххэ-дууһаҕа иҥэн хаалла. Казахстаҥҥа ыалдьыттыы кэлээриҥ, биһиги эмиэ ыалдьытымсах омукпут», — диир кини.

Оонньуу аан бастаан саҕаланыаҕыттан Казахстан кыттар. Быйылгы күрэхтэһиилэргэ сүүмэрдэммит хамаанда састаабыгар 220 тахса киһи кэллэ, спортсменнары таһынан тренердэр, төрөппүттэр бааллар.

Хамаанданы өрөспүүбүлүкэтээҕи гражданскай уопсастыба институтун сайыннарыы министиэристибэтэ иилээн-саҕалаан илдьэ сырытта. «Делегация кэлиэн инниттэн волонтердары кытта көрсөн, ким туох иһин эппиэтинэстээҕин чопчу быһаарбыппыт. Ыалдьыттар мэтээллэх эрэ буолбакка, Саха сирин туһунан саамай үчүгэй өйдөбүллээх баралларын ситиһэр соругу туруорбуппут. Өрүс пуордун холбоһуга, «Сахапечать» уонна «Алатау» община үлэлэрин үчүгэйдик толордулар. Күрэхтэһии саҕаламмыта аҕыйах хоммутун кэннэ делегация «Орто Дойдуга», тренердэр уонна салайааччылар Өлүөнэ очуостарыгар сылдьыбыттара. Ону таһынан араас кэнсиэрдэри, испиктээкиллэри биһирээн көрөллөр», — диир миниистири солбуйааччы Савва Михайлов.

Бэс ыйын 11 күнүнээҕи туругунан Казахстан хамаандата 57 мэтээллээх, отон 16-та – кыһыл көмүс, уопсай ахсаанынан Сибиир федеральнай уокуругун кэнниттэн иккис миэстэҕэ иһэр.

Следите за самым важным и интересным в Telegram-канале и WhatsApp-группе ЯСИА