29 Кулун тутар 29.03
  • -15°
  • $ 92,26
  • 99,71

Өймөкөөн улууһугар оту Магадаантан тиэйэллэр

Читайте нас на
Яндекс Новости
ЯДВ

Ааспыт сайын курааннаан, от үүнүүтэ үгүс улууска быстар мөлтөх этэ. Ону учуоттаан СӨ Ил Дархана от үүммэтэх уонна ойуур баһаарыттан эмсэҕэлээбит уон улууска эрэгийиэннээҕи ыксаллаах быһыыны-майгыны биллэрбитэ. Бу уон улуус иһигэр Өймөкөөн улууһа эмиэ киирбитэ.

Атырдьах ыйыгар улуус баһылыгын дьаһалынан туораттан төһө тонна от уонна сүөһү эбии аһылыга наада буолара чопчуланан, Магадаан уобалаһыттан оту тиэйэн ыларга кэпсэтии барбыта.

«Биһиги Магадаан уобалаһыттан барыта 797 тонна оту тиэйтэриэхтээхпит. Онтон аҥаарын бу сыл бүтүөр диэри аҕалар сорук турар. Билиҥҥитэ 22 тонна оту “Өймөкөөн Тымныы Оройо” МТ аҕаллыбыт. Бу күннэргэ окко наадыйар тыа хаһаайыстыбатын бородууксуйатын оҥорон таһаарар хаһаайыстыбаларга барыларыгар үбүлээһин оҥоһулунна. Онтон кинилэр оту атыылаһарга көрүллүбүт харчыны “Северное графство” ТХПК суотугар түһэриэхтээхтэр. “Северное графство” ТХПК быйыл саҥа тэрилиннэ. Тэрилтэ оройуоҥҥа тыа хаһаайыстыбатын бородууксуйатын оҥорон таһаарыыны биир кииннээн үлэлэтэр соруктаах, салайааччынан Григорий Сивцев ананна. Оту тиэйиигэ икки олохтоох урбаанньыты кытта дуогабар түһэристибит, кинилэр бу кэмҥэ Магадаантан оту тиэйиинэн дьарыктаныахтара», — диэн Тыа хаһаайыстыбатын управлениетын начаалынньыга Павел Сивцев сэһэргээтэ.

Быйыл сайын, улуус баһылыга Иннокентий Сивцев салайааччылаах, анал хамыыһыйа Магадааҥҥа тиийэн от кэпсэтэригэр сүрүн болҕомтотун от хаачыстыбатыгар уурбута. Үлэһиттэр оту куруустуулларыгар болҕомтолоох буолалларыгар сорудахтаммыта. Урукку сылларга атын улуустартан оту аҕаларга суоппардар өрүү инньэ гыналлара.

«Сүөһү эбии аһылыгын ыларга ханнык собуоту кытта дуогабар түһэрсэргэ үлэ бара турар. Урукку сылларга Алтайскай кыраай собуоттарын кытта тахсыылаахтык үлэлээбиппит. Быйыл атын барыйааннары эмиэ көрөбүт. Барыта, биллэн турар, сыанаттан тутулуктаах. Былаан быһыытынан сүөһү эбии аһылыгын тиэйии 2022 сыл кулун тутарыттан саҕаланыаҕа«, — диэн Павел Сивцев кэпсээнин түмүктээтэ.

Ити курдук бу күннэргэ олохтоох бородууксуйаны оҥорон таһаарар хаһаайыстыбалар көмө отунан хааччыллыахтара. Тыа сирин дьоно онтон кыстыгы этэҥҥэ туоруурга эрэх-турах сананаллар.

Любовь Кривошапкина
Северная Заря

Следите за самым важным и интересным в Telegram-канале и WhatsApp-группе ЯСИА