Өймөкөөн улууһугар 2016 с. оттооһун хампаанньатыгар уопсайа 450 отчут уонна 10-н тахса тиэхиньикэ оттуу тахсара былааннанар.
«Быйыл сайын Өймөкөөн улууһугар барыта былаан быһыытынан 3809 тонна от оттонуохтаах. Онтон тэрээһиннээх хаһаайыстыбалар 405 тонна, бааһынай хаһаайыстыбалар – 1154 тн уонна чааһынай дьон – 2250 тонна оту оттоон кэлэр кыстыгы көрсүөхтээхпит», — диэн улуустааҕы тыа хаһаайыстыбатын управлениетын кылаабынай экономиһа Василий Бессонов иһитиннэрэр.
Кэлиҥҥи икки сылга СӨ Бырабыыталыстыбатын өйөбүлүнэн, СӨ Ыччат дьыалатыгар уонна дьиэ кэргэн политикатыгар министиэристибэ иһинэн, улууска устудьуоннар этэрээттэрэ кэлэн, олохтоох дьоҥҥо окко көмөлөһөн улахан өйөбүл буоллулар. Быйыл улуустааҕы Тыа хаһаайыстыбатын управлениета 120 устудьуону ыыталларыгар көрдөһөн сайаапка түһэрдэ.
Томтор нэһилиэгэр тыа хаһаайыстыбатын бородууксуйатын оҥорон таһаарааччылар холбоон 1453 тонна оту оттуохтаахтар. Ол иһигэр, ынах-сүөһү, сылгы уонна таба ииттэр бөдөҥ хаһаайыстыбалар: “Өймөкөөн” ХЭТ — 180 т; “Тонор” ТХПК — 85; “Мола” аҕа ууһунан общината 35 т оту кэлэр кыстыкка хаһааныахтара. Онтон кэтэх сүөһүлээх хаһаайыстыбалар 703 т. оту бэлэмниир былааннаахтар. Сордоҥноох нэһилиэгэр 494 т от оттонуо. Онтон “Уйгу” ТХПК 20 т оту бэлэмниэҕэ. Кэтэх хаһаайыстыбалар 241 т оту туруоруохтара. Өймөкөөн нэһилиэгин бу сыллааҕы былаана 1280 тонна. Чааһынайдар эмиэ ботуччу былааннаахтар — 1 010 тонна. Төрүт нэһилиэгэр быйылгы дьыллааҕы оттооһун былаана 325 тонна. Биирдиилээн чааһынай хаһаайыстыбаларга 209 тонна оту туруорар соруктаахтар. Үчүгэй нэһилиэгин уопсай былаана 237 тонна. “Үчүгэй” ФГУП 85 тонна, кэтэхтэр – 77 тонна. Уус-Ньараҕа уопсайа 20 тн от оттонуохтаах. Онтон “Виноградова Л.А.” ИП 10 тонна оттоноро былааннаммыт.
