Ил Дархан Айсен Николаев Аҕа дойду Улуу сэриитин бэтэрээнин 96 сааһыгар саахымакка спорт маастарыгар хандьыдаат буолбут Наум Слепцову эҕэрдэлээтэ.
«Өксөкүлээх Өлөксөй Былатыан Ойуунускайы саахымакка оонньуурга үөрэппит. Ойуунускай — Тихон Таппыровы, Таппыров Наум Трифоновиһы. Аан бастаан саахымакка 1934 сыллаахха оонньообутун Наум Слепцов бүгүҥҥү курдук өйдүүр. Оччолорго 10-наах уолчаан тэтэрээтинэн наҕараадаламмыт», — диэн суруйбут Ил Дархан бэйэтин Инстаграм сирэйигэр.
«Наум Трифонович идэтинэн нуучча тылын, литературатын учуутала. Ол эрэн саахымат көмөтүнэн кэлин математиканы, физиканы биэрэр буолбут. Төрөөбүт Чөркөөҕөр саахымат куруһуогун тэрийэн үлэлэппит. Онтон алта өрөспүүбүлүкэ чөмпүйүөнэ үүнэн тахсыбыт. Кэлин выпускниктар бэйэлэрэ Арассыыйа, Европа, аан дойду чөмпүйүөннэрин, гроссмейстердарын иитэн таһаарбыттар.
Наум Трифонович билигин да араас күрэхтэһиилэргэ көхтөөхтүк кыттар, биир сиргэ тэһийэн олорбот общественник. Сылын аайы саахымат турнирдарын тэрийэн ыытар. Быйыл Кыайыы 75 сылыгар 75 бэтэрээни уонна 75 эдэр саахыматчыты күрэхтэһиннэрэр баҕалааҕа пандемиянан сибээстээн олоххо киирбэтэ. Сотору кэминэн ураты турнир буолар ини», — диэбит Ил Дархан.
Ил Дархан Наум Трифоновичка кытаанах доруобуйаны, уһун олоҕу баҕарар.
