Эбээн-Бытантай улууһугар табаһыттар сүлүөттэригэр Хотугу норуоттар Спартакиадаларын гимнэ — «Өрөгөй ырыата» сүрэхтэннэ. Бастыҥ ырыаһыттар толорууларыгар эрчимнээх хотугу ырыа бар дьону түмэн, Бытантай сиригэр саргылаах олоҕу түстээтэ.
«Арассыыйатааҕы сыл поэта-2014» үрдүк аат хаһаайына, биир дойдулаахпыт Михаил Колесов тылларыгар, олохтоох мелодист, өрөспүүбүлүкэҕэ биллэр ырыалардаах Влад Колесов мелодиятыгар «Өрөгөй ырыата» киэҥ түһүлгэҕэ дуораһыйан кэлбит эрэ киһи сүрэҕин ньүөлүттэ, дууһатын таарыйда.
Дула-Хайа кэтэҕиттэн Үтүө күммүт таҕыста, Сааскы сырдык сардаҥатын Күн сиригэр тарҕатта.
Эмиэ хоту Саккырыырга Табаһыттар мустаннар Үгэс буолбут Оонньууларга Айаннатан кэллилэр.
Тыалы кытта тыал буолан Буур таба кыаҕа туолан, Хомураҕы хайытан Сүүрдэ күҥҥэ ойутан!
Сыыра-халты харбатан Хоһууннары санатан, Имигэстик тусталлар Дохсун эдэр уолаттар.
Бурҕас гынан сүүрэллэр Күлүктэрин хаалларан, Маамыктаны түүрэллэр Дьоллорун тутаарылар.
Дьон сүрэҕэ сылыйар Маннык кэрэ күннэртэн, Ырыа-дорҕоон халыйар Саас кэлбитин бэлиэтээн.
Саҥа сүрэхтэммит гимн Эбээн-Бытантай улууһун ылбаҕай куоластаах бастыҥ ырыаһыттарын толоруутугар Түгэһииргэ мустубут табаһыттары кыайыыга-хотууга кынаттаата.
Ааптар: Бытантай уоттара хаһыат
