Бэҕэһээ, ыам ыйын 19 күнүгэр, Пионерия күнүгэр, Саха Өрөспүүбүлүкэтин ВФСК ГТО эрэгийиэннээҕи киинэ адаптивнай физическай культураҕа уонна спорка өрөспүүбүлүкэтээҕи киин (РЦАФКИС) үлэһиттэрин кытта В.П. Решетников аатынан Кырдьаҕастар уонна инбэлииттэр өрөспүүбүлүкэтээҕи интэринээт-дьиэлэрин олохтоохторугар истиҥ, доҕордуу көрсүһүүнү тэрийэн ыыттылар.
Көрсүһүү сырдатар лекциянан саҕаланна. Кырдьаҕастар уонна доруобуйаларынан хааччахтаах дьон «Үлэҕэ уонна көмүскэлгэ бэлэм буол» (ГТО) бүтүн Россиятааҕы комплекс историятыттан кэпсэттилэр, билиҥҥитин уонна инники сайдыытын туһунан иһиттилэр.
Тэрээһин саамай чаҕылхай чааһынан анал усулуобуйаҕа сөп түбэһиннэриллибит спорт көрүҥнэрэ буоллулар. Кыттааччылар лазернай саанан бэргэнник ытыыга куоталастылар уонна «корнхол» диэн азартнай оонньууну боруобалаатылар. Саалаҕа күрэхтэһии үөрүү-көтүү уонна күлүү-оонньуу аргыстанна.
Тэрээһин туһунан бэйэлэрин санааларын үөрүүлээх түгэн кыттыылаахтара кэпсээтилэр.
«ГТО комплекса олус суолталаах, ордук биһиги эдэр көлүөнэбитигэр. Бу — нация доруобуйатын төрдө», — диэн санаатын үллэһиннэ 72 саастаах Мария Семеновна Григорьева.
«Итинник бырайыактар үүнэр көлүөнэҕэ олус наадалар уонна спорт туһунан бары саастаах дьоҥҥо агитациялыыр улахан суолталаах. Киин үлэһиттэрэ биһиэхэ кэлэн маннык бырааһынньык тэрийэн, санаабытын көтөхпүттэригэр ис сүрэхпититтэн махтанабыт!» — диэн эттэ 79 саастаах Татьяна Константиновна Капустина.
«Биһиги кэммитигэр бу комплекс «Үлэҕэ уонна көмүскэлгэ бэлэм буол» диэн ааттанара, мин ол саҕана нормативтары барытын кыһыл көмүс бэлиэҕэ туттарбытым!» — диэн киэн тутта ахтан ааста 86 саастаах Егор Федорович Лаптев.
«ГТО барытыгар!» диэн девизтээх көрсүһүү бары кыттыылаахтарга күүс-уох, истиҥ сыһыан уонна үтүө санааны бэлэхтээтэ. Маннык аахсыйалар спортка уонна чөл олоххо саас хааччаҕа суоҕун өссө төгүл чаҕылхайдык дакаастыыллар.
